Venice Film Festival 2020 kaltlangpui dawn
Coronavirus lengin a tihbuai nasat ber ram zingah tel mah se Venice Film Festival 2020 Oraganizer Board Of Directors zinga mi Veneto Governor Luca Zaia chuan ruahman anga kaltlangpui a nih dawn thu a sawi.
Film Festival buatsaihtu lam aṭang hian thuchhuah mumal tak tihchhuah la ni lo mah se Venice Film Festival vawi 77-na hi ṭhulh a nih dawn thu sawi a la ni lo a, Veneto Governor-in kaltlangpui a nih dawn thu a sawi leh takah chuan an kaltlangpui dawn tho niin a lang.
September 2 aṭanga 12 inkara neih tura ruahman Venice Film Festival 2020 hi kaltlangpui a nih chuan hripui len hnua film event lian neih hmasak ber a ni dawn a, mahse kaltangpui tum a ni hian sawi zui erawh a hlawh hle.
Italy-ah hian Covid-19 vangin mi 32,700 an thi tling tawh a, US leh UK tih lohah chuan thihpui tamna ber ram an ni mek.
Venice Film Festival
Khawvela film festival lian ber zinga mi Venice Film Festival hi Europe-a film festival upa ber a ni a, kum 87 kal ta, August 6, 1932 khan Venice Biennale peng pakhat ni tura ṭan chhuah a ni.
Kumtinin August emaw September-ah emaw neih ṭhin niin Venice Lagoon-a Lido hmunah an buatsaih ṭhin a, hmun lar tak Palazzo del Cinema-ah screening an nei ṭhin.