Eminem-a'n Online Listening Party buatsaih dawn

Rap icon Eminem chuan a album hit 'The Marshall Mathers LP' kum 20 tlin lawmna pualin online listening party a buatsaih dawn.

Eminem hian Nilaini hian music streaming service Spotify-ah online listening party hi a buatsaih dawn a, a hun tur tak erawh la puang chiang lo mah se fan-te chuan zawhnate an zawt thei dawn a,  'Stan', 'The Real Slim Shady' leh 'The Way I Am'-te awmna album hi an ngaithla thei dawn bawk.

'The Marshall Mathers LP' hi Eminem studio album pathumna a ni a, khawvelin a hmelhriat ṭanna a ni bawk. Hemi vang hian a ngai hlu hle tih a hriat a, 'Stan Varsity' hoodie-te pawh a tlangzarh hial a, mahse limited edition a ni thung.

U.S. Billboard 200 chart-a No.1 a nihpui 'The Marshall Mathers LP' hi kar khat chhungin copy maktaduai 1.78 a hralh hman a, US-ah chuan studio album hralh chak ber a ni hial. Billboard 200 chart-ah hian kar riat chhung lai No.1 a ni thei a, khawvel pumah copy maktaduai 25 a hralh thei a ni.

Kum 2001 Grammy Awards-ah khan Best Rap Album a dawng a, MTV Europe Music Award-ah pawh Best Album a dawng bawk.

Eminem hian 'The Marshall Mathers LP' hnuah hi chuan album a tihchhuah a hlawhtlinpui em em vek tawh a, rap khawvelah chuan a sulhnu a dai tawh ngai dawn lo a ni.