Ranbir Kapoor-a'n chawlh la dawn

Bollywood star, Ranbir Kapoor chuan hun eng emaw chen lemchan khawvel aṭangin chawlh a la dawn tih a sawi.

Zoom kaltlanga a fan-te nena an inkawmnaah, Ranbir chuan Alia Bhatt nena an fanu, Raha bula hun tam zawk hman a duh avangin lemchan lam a chawl rih dawn tih a sawi. Hetih lai hian a nupui, Alia Bhatt erawh chu a film thar, 'Jigra' atan shooting neiin a buai hle thung. Hei vang hian Ranbir chuan an nu a buai laiin a fanu a lo enkawl ve thung a ni. Ranbir leh Alia-te hi nikum April thla khan an innei a, November 6-ah an fanu Raha hi a piang a ni.

Ranbir hian film thar tihchhuah hmabak a nei mek bawk a, December 1 hian Anil Kapoor leh Rashmika Mandanna te nena an channa, 'Animal' chu tlangzarh a ni dawn. He film-ah hian Anil Kapoor hi Ranbir-a pa lemah a chang a ni.