Oct. 30-ah MSSC ESPORTS RISING CUP 2023 Grand Final

Mizorama Esports tournament lian ber, Mizoram State Sports Council leh Rip Mizo Gaming-te ṭangkawp buatsaih, MSSC ESPORTS RISING CUP 2023 chu a hmawr bawk a ni dawn ta. October 30, chhun dar 12 aṭangin Hawla Indoor Stadium, Republic Vengthlangah Grand Final khelh a ni ang

MSSC ESPORTS RISING CUP 2023 hi sorkar hriatpuia Mizorama Esports tournament huaihawt hmasa ber leh pawisa tamna ber tur a ni. Tournament-a sum fai sem ral tur hi Rs. nuai hnih niin, Champion team hian Rs. nuai 1 leh trophy an dawng dawn a ni.

Grand Final hi chhawng hniha ṭhen a ni a, first session-ah match 4 khelin, second session-ah match 2, a vaiin team tinte'n match 6 an khel dawn a ni. Final-ah hian team 17-te an inel dawn a ni. Final hi a hmunah mipuite en theih tura ruahman niin, en man hi mi pakhat tan first session leh second session-ah Rs. 50 a ni ang. A hmuna kal remchang lo tan pawh Mizoram State Sports Council YouTube channel-ah live-a pek chhuah a ni dawn a, hei hi channel dangah lo live chhawn phal a ni lo.

Mizorama Esports tournament lian ber huaihawt thei tura MSSC inpekna hi Rip Mizo Gaming chuan ropui an ti a, an chungah thinlung takin lawmthu an sawi. Kum dangah pawh he tournament hi huaihawt zel an tum nia hriat a ni.