Lady Gaga leh Ariana Grande-te'n hla thar tichhuak

Zirtawpni liam ta khan Lady Gaga leh Ariana Grande chuan hla thar 'Rain on Me' an tichhuak.

'Rain on Me' hi Lady Gaga studio album parukna tur 'Chromatica' a mi a ni.

Nithum chhungin Gaga-te hla thar tichhuah hian YouTube lamah thlirtu mi maktaduai 41 chuang a nei hman. Kum 26 mi Ariana hian May thla tir khan Justin Bieber thawhpuiin hla thar 'Stuck with U' tih chu a lo tichhuak tawh bawk a, kha pawh kha a 'hit' hle a, kar hnih chhungin thlirtu maktaduai 48 chuang an awm hman.

Kum 34 mi Gaga hian April 10 khan a album parukna tur, 'Chromatica' hi tlangzarh a tum a, February 28 khan he album-a single hmasa ber 'Stupid Love' chu a lo tichhuak tawh nghe nghe. Khawvel ram zawng zawng deuh thawah Covid-19 a darh tak siah chuan a album tlangzarh hun tur hi a tikhawtlai a, May 29-ah tlangzarh a tum ta zawk a ni.

 

Tun kara a album tihchhuah tum hi kum 2016-a a album tihchhuah 'Joanne' chhunzawmna tur a ni a, Ariana bakah hian K-pop girl band Blackpink leh Elton John-te pawh a thawpui bawk.