Joshua hmachhawn turin Wilder a inpeih
American boxer rothap Deontay Wilder chuan Anthony Joshua hmachhawn tura a inpeih thu a sawi a, British boxer nena an inbiakna chu a tlawlh a nih chuan, thil pawi tak a nih tur thu a sawi.
Kum 38 mi Wilder chuan, "Fight turin ka inpeih tawh tih ka hriattir che a, kan nuna hun duhawm ber chu i thlentir ang hmiang. Mi zawng zawngin he fight hi an nghakhlel a, a thlen ngei pawh ka beisei.
"Kei pawhin kan inhmachhawn ngei theih nana tih theih zawng zawng chu ka ti vek a ni," a ti a, Joshua hmachhawn tura a inpeih thu social media lamah pholangin, a inhrosa nasa hle.
Joshua hian Oleksandr Usyk leh Tyson Fury inhnek ruala Wilder nen an inhmachhawn ve theih thu tun hnaiah khan a sawi a, mahse, tuna thil kal dan en chuan a rualin zan khatah fight pahnih hi a thleng kherin a rinawm lo - heti lam hawia ruahmanna a la awm rih lo.
Usyk leh WBC champion Fury te hi kuminah an inhnek dawn a, an inhnek hun tur hi December 23 ni tura ngaih niin, Saudi Arabia lam an hawi. Joshua pawh hian December-a fight hmachhawn a duh thu a sawi a, mahse, Wilder laka inbuatsaihna tur match a nih a rinawm mah zawk.
Kum 34 mi Joshua leh Wilder hi September thla khan an inhnek theih thu promoter Eddie Hearn chuan a lo sawi tawh a, mahse, a tira an thawhpui Saudi Arabia lam an inhnuhdawh avangin beisei angin a thleng leh ta lo - pawl pahnih an inbe ṭha leh a, nakkum kumtira USA-a inhnek thei dinhmunah an ding mek.
Wilder chuan, "Anthony lo ngaithla la, ka ka aṭanga chhuak ngei a ni. Hetah hian ka awm a, fight hmachhawn turin ka inpeih e. I promoter Hearn-a'n ka fight hnuhnung ber a rei loh thu leh, rei tak fight ka hmachhawn tawh loh thu a sawi ka lo hria.
"Kan pahniha ring chhunga inhmachhawn a, buaina hi kan chingfel thei lo a nih chuan thil uiawm tak a ni ang," a ti a, Joshua a cho zak zak hle.
Wilder hian October 2022 khan Robert Helenius chu round khatna lekah a knockout a, hemi hnu hian fight a hmachhawn leh tawh lo. Joshua hian August 2023 khan Helenius tho hi hmachhawnin, round sarihnaah a knockout thung.