88th Academy Awards Tuman Leonardo an vuipui tawh lo ang

Movie khawvela inchawimawina ropui ber, 88th Academy Awards, Oscars tia an sawi chu Dolby Theatre, Hollywood, California-ah sem a ni ta a, tunah chuan khawvelin Leonardo DiCaprio hi an vuipui tawh lo ang.

Titanic aṭang tawh khan khawvelin Leonardo hi Best Actor dawng tura an beisei a ni tawh a, hemi hnu hian movie hit leh hmuhnawm tak tak eng emaw zat a chang leh tawh a, mahse Oscar-ah an beiseipui ang a ni lo zel. Kuminah erawh chuan Leonardo hian a nghak chhuak ta a, The Revenant hmangin Best Actor a dawng ta.

Best Actor a dawnah hian Leonardo chuan, "The Revenant film hi khuarel khawvel leh mihring inlaichinna leh inzawmna chungchang a ni; kum 2015 kha khawvelin kum a hman tawh a, chawhrualin kum tluana a lum ber kum a ni. Vur hmuna chang tur hian khawvel chhim tawp lam pan a ngaih phah a ni. Sik leh sa inthlak thleng hi thil tak tak a ni a, tunah hian a thleng mek. Tungchhoa kaltena harsatna leh hlauhawm kan hmachhawn mek chu a ni a, chuvang chuan a titawp tur hian kan ṭanrual a ngai a ni," tiin, environmentalist a nihna rilru aṭangin a sawi chhuak. Leonardo hian environment humhalh nan sum tam tak a thehchhuak tawh a ni.

The Revenant film hi a hlawhtling hle a, box office-ah chauh ni loin, Oscar-ah hian award pahnih a hawn a, Best Director award chu Alejandro Gonzalez Inarritu chuan a dawng a, hei bakah hian Best Cinematography a dawng bawk.

Best Actress hi Brie Larson chuan a dawng a, a dawnna movie hi 'Room' a ni. A tana Oscar-a Best Actress a dawn hmasak ber a ni. Best Actress-ah hian Cate Blanchett, Jennifer Lawrence, Charlotte Rampling leh Saoirse Ronan te an lang. Brie Larson hian a movie channa aṭang hian Golden Globe-ah award a dawng tawh a, Independent Spirit Award a dawng tawh bawk.

Movie mala award dawng hnem ber hi The Revenant ni loin, Mad Max: Fury Road a ni thung. He movie hian award paruk ngawt mai a hawn a, Best Production Design, Best Costume Desig, Best Makeup and Hairstyling, Best Film Editing, Best Sound Editing leh Best Sound Mixing te a hawn.

Leonardo hi The Aviator te, Blood Diamond te avang khan Best Actor-ah nominate a ni tawh a, mahse a la dawng lo a, tun hi Best Actor a dawn hmasak ber a ni. Best Actor category-ah hian Bryan Cranston, Matt Damon, Michael Fassbender leh Eddie Redmayne te an lang. Titanic-a a chanpui Kate Winslet chuan a lawmpui hle a, a lo ṭah phah hial!