Sawisel hlawh Oscars

A tir aṭang rênga sawisel a hlawhna chu chi hrang an kim lo tih kha a ni a, hei vang hian midum film chan thiamte chuan a hma aṭang tawhin Oscar an boycott tih an lo sawi chhuak tawh a, hei bawk hi tun ṭuma an sawi kai chu a ni.

Host Chris Rock chuan Oscar hian hnam hrang hrang a fun kim lohzia a sawi chhuak a, "White People's Choice Awards" a ni e a tih kha a ni. Chris Rock hian Oscar hi a racist a ni tih chiang takin a sawi lang bawk.

Oscar sem hlim, kum 1929 aṭang tawh khan nomination-ah hming 1,668 a lang tawh a, heng zinga zaa 6.4 chauh hi mingo ni lo an ni. Academy-a executive member zinga zaa 96 ngawt hi mingo an ni bawk.

Best Actress category-ah hian midum hmeichhia 10 chauh nominate an la ni a, a dawng phei chu pakhat chauh - Halle Berry chauh a la ni. Latino hmeichhia zingah phei chuan pathum chauh an la awm a, tuman an la dawng lo. Asian zingah chuan Merle Oberon khan, kum 1935 khan Best Actress-ah nominate a ni a, ani bak hi tumah dang nominate an la ni lo.

Latino mite zingah kum 88 Oscar sem tawh chhungin Latino actor leh actress te hi vawi 16 chauh nominate an la ni. Asian actor leh actress zingah Oscar dawng pahnih chauh an la awm a, nomination-ah chuan vawi 15 an lang ve tawh.

Asian zinga Best Actor-as nominate awm chhun chu Ben Kingsley chauh a ni a, Oscar-ah hrim hrim ṭum hnih nominate a ni tawh a, vawi khat a dawng. Kum 1982-a Gandhi tih a chanah khan a dawng. Latino zingah chuan Best Actor-ah mi pali hming a lang tawh a, kum 1950 khan Jose Ferrer chuan a dawng. Midum zingah Best Actor-ah mi pali chauhin an la dawng.

Midum hmeichhia zingah Halle Berry chauhin Best Actress a la dawng a, a dawn ṭum hian mihâng hmeichhiate tan pawha hetiang dinhmuna a din ve theih tak avanga lawmawm a tihzia a sawi a, mahse hmasawnna erawh a la tam lo hle