2022-ah music aṭanga sum lak luh 28%-in a pung

International Confede-ration of Societies of Authors and Composers (CISAC)-in Global Report 2022 a tihchhuah tharah, kum 2022 chhunga khawvel pum huapa music aṭanga sum lak luh chu kum 2021 aiin 28% in apung a, sum lak luh hi USD tld 11.4 a tling.

Kum 2022-a live leh public peformance sector - concert, exhibition leh theatre aṭanga royalty hmuh chu 69.9%-a pungin USD tld 2.83 a tling bawk.

Digital chu sum lak luhna lian ber a ni tawh a, kum 2021 aia music streaming aṭanga sum hmuh hi 33.4%-a pungin, digital royalty hmuh hi USD tld 4.43 a tling pha. Sum lak luh tamna ber ni ṭhin, TV leh radio category chu digital hnuaiah awm tawhin, an sum lak luh hi USD tld 3.75 a la tling pha bawk a ni.

Covid hripui a len hnuah digital aṭanga sum hmuh hi 100% zeta pungin, TV leh radio aṭanga sum hmuh 4.6% in a pung a, hetih lai hian live leh public performance aṭanga sum hmuh chu 7.9% in a tla hniam thung.

Khawvel huapin music market a ṭhang nasa a, sum pawh an la lut hnem hle. Market lian ber chu US niin kum 2022-a an sum lak luh punna hi 30.5% a ni a, USD tld 2.759 an la lut. France-in dawntin USD tld 1.398 an la lut a, music market aṭanga sum la lut tam zual zingah hian United Kingdom, Germany, Japan, Italy, Australia, Canada, Spain leh Korea-te an tel.

Hetih lai hian CISAC president Bjorn Ulvaeus chuan artificial intelligence chuan music industry hmasawnna zel turah nghawng a rawn a neih a hlauhthawnawm hle tih a sawi. CISAC hi authors societies network a ni a, music, audio-visual, drama, literature leh visual arts creator-te tana thawktu leh an dikna chanvo humhalhna tura beitu an ni.