Vanglaini Bihchianna : Entrepreneur Huang - Gilgal Ice-Cream

Mizorama thar chhuah, bawnghnute hmanga ice-cream flavour hrang hrang siam chhuaktu, Gilgal Ice-cream chu Vanglaini chuan a bihchiang a.

Bul ṭan dan

Gilgal Ice-cream hi Lallawmzuala, Ramhlun South din a ni a, kum 2020 Covid hunlai, tu mah pawn chhuah theih loh laia YouTube-a bawnghnute powder advertisement a hmuh aṭangin a sumdawnna tur hi a ngaihtuah chhuak a ni. Lallawmzuala hi Lungdai khaw chhuak niin, Lungdai hi bawng vulh tamna, Mizorama bawnghnute tamna hmun a ni. Advertisement a hmuh aṭang hian an bawnghnute thar chhuahte sawngbawlna awm thei se, a khaw mi tan leh a sawngbawltu tur tan pawh phurh kual buai ngai loin, hmun leh hmunah sumdawnna eizawnna tling tak a tih theih dawn tih a ngaihtuah ta a. A theih anga hma lain, kum 2022, September 19 khan Bank of Baroda finance-na hnuaiah ice-cream siamna khawl bun ṭanin, kumin March thla aṭang khan zawrh chhuah theih turin a siam thei tih Vanglaini a hrilh.

Lallawmzuala hian Gilgal Ice-cream din tur hian training hrang hrang a nei a, Milk Processing Centre te, state danga Ice-cream factory lianahte training a nei a ni.

Thil tum

1) Company hrang hrang Mizoramah an lo lut zel a, hemi karah hian Gilgal Ice-cream chuan phai aṭanga lo lutte nena a tuina inang, mi zawng zawng lei phak tura siam chhuah a tum a ni. Zuar chhawngte tan pawha awmze awm tak siin, a leitute tan pawh to si loa kalpui an tum.

2) Ramri buai, kawng dan leh khuarel chhiatna avanga kawng pingte a awm leh zeuh zeuh a, chung thil pawh lo thleng se phang bik lo tur leh, mahni intodelh theihna tur neih chu a tum pakhat a ni.

3) Sorkar hnain mi tin a daih tawh lo a, hei vang hian ṭhalai lehkha thiam, thawh tur nei lo tam tak an awm tawh. Chutiang mi hna thawh tur duhte chhawr a, eizawnna siamsak hi Gilgal Ice-cream tum ber pakhat a ni.

Gilgal Ice-cream neitu, Lallawmzuala chuan kan ram thar chhuah, siam chhuahte inngaihhlut thiamsak tura mipui rilrua tuh an tum tih Vanglaini a hrilh. "Tun dinhmunah mipui rilruah mahni Mizo pui ngei thil siam chhuah hi tui lo bik, ṭha lo bik tura ngaihna a la lian hle. He ngaihdan hian kan ram hmasawna tur tam takin a ti ṭhuanawp thei. Hei vang hian kan sumdawnna kaltlang hian ram tihhmasawnna turin mahni ram siam chhuah leh thar chhuah ngaihhlutsak thiam tura mipui rilrua tuh hi kan tum pakhat a ni," a ti.

Thil siam chhuah/zawrh chhuah lam

Gilgal ice-cream hian tunah ice-cream hi flavour 20 chuang an nei a, sugarfree ice-cream pawh an siam thei bawk. Ice -cream hi a quality azirin a man chi 4 in an ṭhen a, Rs 5, 10, 20, 30 tein ṭhen hran a ni. A zuar chhawngte chu a man aṭangin 20% zel share pek an ni.

District hrang hrangah agent neiin, agent ni duh tan a dil theih reng bawk. Aizawl khaw chhung bikah a free in an deliver a, agent an la neih lohna khua, Aizawl khaw pawn chu a thawn man an tumsak ṭhin.

Gilgal Ice-cream hi FSSAI standard hnuaiah, Mizo rilrem zawng tur takin a sweetness leh a milk quality-te adjust vek a ni. Zuar chhawngtute leh Agent-te duh ang quality-in an adjust-sak thei bawk. An thil siam chhuahte hi Instagram-ah @gilgal_ice_cream tihah a en theih a ni.

Thawktu

Tunah hian hnathawk hi pali awm mekin, hnathawkte hi factory-ah riahna hmun engkim a free-a pek an ni. Thawktu hi indaih loh a nat avangin a dil reng theih. Hemi rual hian thawktu lak an uluk a, an lo thawh tawhnate be hmasain, an nungchangte uluk takin an zir chiang phawt ṭhin.

Harsatna

An thil siam chhuahte hi Mizo siam a nih avanga hmu hniam nghal an tam a, sumdawng ṭhenkhatah harsatna an tawh phah ṭhin. Thil siam chhuah lama eizawngte chuan an thil siamte phai lam product elpui thei tura ṭan lak ṭheuh a pawimawh hle tih Lallawmzuala chuan sawiin, "Pakhat tihṭhat loh avangin tam takin kan tuar thei a ni tih kan hriat a pawimawh em em a ni," tiin Vanglaini a hrilh.

Hmachhawp

Company lo lut apiangte siam ang chu siam ve zel an tum a, an siam thei ve deuh zel bawk. Kum thar lamah khawl thar lei a, changtlung leh huam zau zawka kal chhoh tumin ngaihtuahna an seng mek.

Entrepreneurship chungchang

Mahni kutkawih eizawnna chungchanga Vanglaini zawhna chhangin Lallawmzuala chuan, "Entreprenuer tamna apiangah ram a changkang. Kan ramah chuan sawrkar hna kum over thleng ṭhak beih tum kan tam hle. Mi ramah chuan mahni thiam zawng, tui zawngte thlang fel thlapin mahni ke ngeia din tumin hma an la ṭhin. Mi tihdan ṭhate hi kan entawn a, sawrkar hnaah ngawt innghah tum loin kan ṭhat vanglaiin mahni thiamna leh theihna hmangin midang hna petu nih tum ila. Kan thlah kal zel turte tan eizawnna chhunzawm tlak siam tumin hma lak tum ila. Amaherawh chu mihring hian thiam/ theih bikna line ṭheuh kan nei tih hriat a, mi tih apiang tih ve ngawt a fuh lo. Kan tih tumte uluk takin ngaihtuah hmasak a ngai phawt a ni, " tiin a sawi.