Chapchar Kût Vawiinah hman a ni dawn ta

Mizotena kût kan neih zinga ropui ber, Chapchar Kût chu vawiin chawhma dar 10:30 aṭang hian Lammualah hman a ni dawn ta a, kût hmanna atana inbuatsaihna hrang hrangte pawh peih a ni ta.

Kumin Chapchar Kût-ah hian Mizoram Home minister, R. Lalzirliana chu Kût Pa a ni ang a, Art & Culture minister R. Romawia chu Kût Thlengtu tur a ni ang. Lâm leh incheina hmuhnawm tak tak entir a ni ang a, tunlaia zaithiam kan neih ṭhat ber berte an zai bawk ang.

Hlado hmangin Mizo Cultural Organisation-in bul an ṭan ang a, Kût Thlengtuin thuhma a sawi ang a, College Veng Branch YMA Zaipawl chuan Central YMA aiawhin 'Kan Zotlang Ram Nuam' tih hla an rem ang a, Rev. Dr. V. laldingliana, BCM Executive Secretary, Aizawl Area chuan hunserh a hman hnuah kût hmanna tak tak ṭan chhoh a ni tawh dawn a ni.

Central YMA-in Cheraw Kânpui an entir tur hi a hmuhnawm leh viau ang a, Art & Culture-te buaipuia Mizo naupang incheina entir tur pawh hi hmuh a chakawm viau. Zai tur zingah hian Rosangliana (Zo Rock), Israel Lalbiakrema, KC Runremsang-i Rebecca Zorintluangi (Mizo Idol 2015) te hi ngaihthlak a chakawm tawh hle.

Chapchar Kût pual hian Diktawn chuan Miss Chapchar Kût a thlang leh dawn a, Mizo nula hnahkhat emaw, thlahpawlh a nih chuan Mizo khua leh tui nei, kum 17 aṭanga 30 inkar, Mizo inthuam pangngai emaw, tunlai deuh hleka design siam inbel, ruihtheih thil laka fihlim aṭanga thlan chhuah tur a ni. Miss Chapchar Kût hian Rs. 10,000, leh First Runner Up aṭanga 3rd Runner Up thlengin, Rs. 5,000 ṭheuh leh smartphone bakah citation leh photo frame te an dawng ang. Miss Chapchar Kût hian smartphone bakah wa-shing machine a dawng tel bawk dawn a ni.