Stephen Curry Bible vangin Nike-in an hnar!

NBA star Stephen Curry chu Nike chuan sneaker siam chhuahah thawhpui an duh a, mahse Stephen Curry han a hminga sneaker tihchhuah a nih chuan, sneaker-a Bible châng tarlan a duh a, hei hi Nike chuan an remti lo a, an hnar leh ta a ni.

NBA star, Stephen Curry hi Kristian ṭha tak a ni a, a Bible châng duh chu Philippi 4:13 thu a ni a, chu chu a sneaker-a ziah zel a duh avangin Nike nen hian an inrem thei ta lo.

Nike hian hnar mah se, Curry hi midang chuan an hnar lo thung. US-a sports wear siamtu lian, Under Armour chuan inremna an ziahpui ta thung a, anni hi chuan Bible châng tarlan hi an hnial lo a ni ngei ang.

Hetihlai hian Nike leh Under Armour tena thuchhuah an siamah chuan Bible châng hi tarlan a ni hran lo a, Bible thu vanga Nike hian thawhpui thei lo anga tarlan a ni hek lo. Mi ṭhenkhatin an sawi dan chuan Nike hian sneaker siam chungchangah hian USD mtd 2.5-a inremna siampui turin an sawm a, mahse Under Armour hian Nike aiin an ngam huai zawk hrim hrim a, USD mtd 4 an phal thung.