American Idol zinga ropui ber Kelly Clarkson

American Idol a season hnu-hnung ber an neih chhoh mek laiin American Idol lo ni tawh leh lo tel tawh ṭhinte music khawvelah an ropuina a zual zel thung. Reality show hlawhtling berte zinga mi, American Idol-ah hian tel tawh leh pakhatna ni tawh pawh mi ṭhahnem tak an awm chung zingah chuan Kelly Clarkson a ropui ber.

Billboard-in tunhnaia American Idol ni tawhte chart-a pakhatna an lo hauh tawh dan a tar chhuahah Kelly Clarkson aia ropui an awm lo. Kelly Clarkson hian chart hrang hrangah pakhatna vawi 100 a hauh tawh a ni.

Billboard-in a tarchhuahah hian Idol lo ni tawh leh tel tawhte US-a chart hrang hranga pakhatna an lo hauh tawh dan tarlan a ni. Kelly Clarkson hian a music thar 'Piece by Piece' hmangin chart pahnihah pakhatna a hauh leh ve ve nen, hengte nen hian Clarkson hi pakhatnaa awm ngun ber niin, chart hrang hrangah pakhatnaah vawi 100 a awm tawh a ni.

'Piece by piece' hla hi Clarkson-i studio album pasarihna 'Piece by piece'-a mi a ni a, Digital Songs chart-ah 35-na aṭangin pakhatnaah a rawn invawrh chho dawrh a, Pop Digital Songs-ah pawh 20-na aṭangin pakhatnaah a rawn kai bawk.

Clarkson hi American Idol hmasa ber a ni a, kum 2002 khan Idol a nihpuina hla 'A Moment Like This' chu Billboard Hot 100-ah 52-na aṭangin pakhatnaah a rawn invawrh dawrh a, chart-a zuang thui ber, pakhatna ni tura kal kân hnem ber record a rawn siam a, a hmaa record siamtu chu The Beatles niin, ;Can't Buy Me Love' hla chu kum 1964 khan 27-na aṭangin pakhatnaah a chho a ni. Kum 2009 khan Clarkson hian ama record siam vêk chu rawn khumin, 'My life would suck without you' hla hmangin 97-na aṭangin pakhatna a rawn luah.

Billboard-in Idol ni tawhte chart hrang hranga pakhatna an hauh tawh zat zawng zawng belhkhawm a tarlan hi vawi 458 zet a ni. Clarkson dawta pakhatna hauh ngun leh chu Carrie Underwood a ni a, Billboard chart mai ni lo, chart dang hrang hrangah pakhatna vawi 83 zet a hauh tawh a, pathumna chu Chris Daughtry niin, a band, Doughtry chu pakhatnaah vawi 40 an awm tawh bawk. Top 5-a lang dangte chu Fantasia (vawi 35) leh Mandisa (vawi 25) te an ni.

Billboard No. 1s American Idol contestant-a sang dangte (an hming tawpa nambar hi chart-a pakhatna an hauh tawh zat a ni)

Phillip Phillips 20

Jennifer Hudson 17

Ruben Studdard 16

Clay Aiken 12

Colton Dixon 12

Scotty McCreery 12

Adam Lambert 10

David Cook 8

Kimberley Locke 8

Josh Gracin 7