Charlie Sheen-a'n a fate a chawm zo ta lo

Two and a Half Men changtu ṭhin Charlie Sheen chuan a Brooke Mueller nena an fate pahnih, phirte chawm nana USD 55,000 a pek ṭhin chu pek tur a nei tawh lo a, thuneitute hnenah a pek ṭhin zat ti tlem turin a ngen.

Court hnenah Charlie Sheen chuan tuna a fate chawm nana a pek ang zat pe ziah tur chuan pawisa a nei tawh lo tih sawiin, a pek zat titlem turin a ngen a ni. A thu thehluhah hian Two and a Half Men a chan lai, kum 2011 kha chuan thla tin USD 613,000 a lalut ṭhin a sawi a, mahse tunah chuan a sum lakluh nasa takin a kiam tawh a ni.

Bill leh fee dang pek tur neuh neuhah tunah hian thla tin USD 105,000 a hman a ngai a, damdawia a inenkawl nan USD 25,000 a hman a ngai ziah bawk a, chu chu a insurance-in a khuh si lo niin a sawi. Chu mai bakah court a hmaa a inlanna vel leh dan lam thil buaipuinaah USD maktaduai khat deuh thaw pawisa pek tur a la nei a, a credit card-ah ba USD nuai 6 lai a nei bawk niin a insawi. A hunlai chuan sum thawk chhuak tam mah se, nawmchenna tur chuan eng anga sum tam pawn a daih lo a ni.