India-ah Samsung Galaxy S7 pahnih

Samsung chuan an phone thar chhuanvawr pahnih - Samsung Galaxy S7 leh S7 Edge te nimin khan India-ah an tichhuak a, kar leh aṭang khian a zawrh chhuah tak chu an zuar chhuak chauh ang.

Samsung hian India-ah tam lehzual an inhralh theih nan sum an seng nasa hle a, a bikin Galaxy S7 leh S7 Edge te hi hralh hnem a tum hle a, Apple tluk phak ngei tumin Samsung hian ṭan a la ni. A man tur zat hi Times of India chuan a la hriat chiah loh niin a tarlang a, mahse rin dan tlanglawnah chuan Rs. 45,000 man vel emaw, a aia sang lam emaw a nih rin a ni.

Samsung hian an model hlui eng emaw zat chu a man tihhnuiam a tum a, an elpui Apple pawhin eng emaw thil ropui tak tih an tum nia tarlan a ni bawk. India-a zawrh turin Samsung chu Galaxy A5 leh A7 2016 edition tihchhuah a tum a, Apple pawh hian March 21 hian iPhone model, eng ber nge tih sawi lan loh, a hmai inchi 4-a hlai chu tihchhuah a tum nia sawi a ni bawk.

Galaxy S7 bik hi a hmai inchi 5.1-a hlai a ni ang a, AMOLED display a nih dawn avangin power a heh lo zual hle dawn. A pixel hi 2550 x 1440 pixel a ni a, US-a an zawrh chhuah hoah chuan a processor hi Snapdragon 820 a ni a, ram dangah erawh chuan Samsung Exynos chipset a hmang thung ang a, a RAM hi 4GB a ni. S7 Edge pawh 4GB RAM tho tur a ni a, a hmai hi inchi 5.5-a hlai a ni thung.