Kim Kardashian zilhhautu Chloe Moretz

If i stay leh Kick-Ass movie-te avanga hriat hlawh tleirawl actress chhe lo Chloe Moretz chuan instagram lama a saruak thlalak phochhuaktu Kim Kardashian chu twitter kaltlangin a khak!

Chloe Moretz chuan, "Kim Kardashin, hmeichhe naupang zawkte tana entawn tlak kan hnutchhiah a pawimawh zia i hriat ka duhsak takzet che - kan taksa pholan chauh lo hi tihtur tam tak kan nei a ni," tiin twitter kaltlangin reality star hi thu ṭha a fah.

Kum 35-a upa reality star erawh Chloe Moretz i zilhna hian a tihbuai hmel loh hle. Fa pahnih lai nei tawh Kim Kardashian chuan, "Tu nge a nih pawh kan hriat loh Chloe Moretz hi twitter-ah i lo lawm ang u, Nylon magazine cover-a i thlalak kha a naupang chhiain a duhawm tawp!' tiin a tih el.

Kim Kardashian hian Chloe Moretz hi hre lo angin insawi mah se The Equalizer” leh “Diary of a Wimpy Kid” actress hi December/January Nylon magazine-a a lan chungchang a sawi avangin a hre ngei niin a lang a, tu khaw kha hriat loh ni anga a chhuah actress hian box office-ah a film chan hrang hrang chu dollar maktaduai 730 chuang a sengluh pui tawh bawk.

Chloe Moretz hian movie chhuak thar tur “Neighbors 2” leh “Brain on Fire,” a nei leh der tawh a, “Brain on Fire”-ah hian New York Post journalist Susannah Cahalan lem a chang dawn a ni.