Penguin nena inkawmngeih Brazilian putar

Rio de Janeiro daifema thliarkar pakhata khawsa Joao Pereira de Souza chu tuipui kama Penguin thi tur a chhanchhuah nen inkungkaihna mak tak an nei a, he Penguin thi mai tur a chhanchhuah hian amah chhanchhuaktu hmu tura a kal apiangin mel 5000 vela thui luipui a hleuh kai ṭhin a ni.

Kum 71-a upa Joao Pereira de Souza hian kum 2011 khan Penguin hi luipui kamah thi chhawngin a chhar a, a thiam ang tawka enkawlin a hmingah 'Dimdim' tih a phuahsak. Sangha mana ei zawng ṭhin Joao hian Penguin hi enkawl dam hnuah chhuah zalen leh mah se amah enkawl damtu a pu hmu tur hian Rio de Janeiro daifema thliarkar khaw pakhatah hian Dimdim hi a kal ṭhin.

Joao chuan, "He pen-guin hi ka hrin ang maia hmangaihin ka enkawl a, ani pawh hian min hmangaih ve niin ka hre ṭhin. Mi dangin an khawih ve chuan a chuk vat ṭhin a, mah se ka bulah erawh thlamuang takin a awm ṭhin a ni," a ti.

Brazilian mi Joao chuan sawi chhunzawmin, "Sik leh sa inthlak apiangin a awmna hmun a sawn ṭhin a, kumtin June thlaah chhuakin February-ah a lo kir leh
ṭhin. Mi tam takin a lo kir tawh lo ang tiin an sawi
ṭhin a, mah se kum li chhung chu ka hnenah a lo kir tawh a ni," tiin Penguin nena an inkungkaihna chu a sawi.