The Beatles producer a thi

The Beatles-te'n hlawhtlinna an chan theihna tur kawnga thawhhlawk tak Sir George Martin chu nimin khan London-a a chenna inah a thi a, kum 90-a upa a ni.

Sir George hian kum 1962-a Parlophone record label hotupa a nih laiin Beatles ho demo ngaithlain record label tam takin an lo hnawl tawh Beatles hi contract a ziahpui a, khawvel hriatah a pho chhuak a ni.

Beatles drummer Ringo Starr chuan, "Pathianin thlamuang takin George Martin chawlh hahdamtir se, a kalsan tak a nupui Judy Lockhart-Smith leh a chhungte vengin thlamuan rawh se," tiin khawvela hriata anmahni phochhuaktu producer lar hi a thlah.

Britain prime minister David Cameron pawhin British producer ropui hi thlahin, "Sir George Martin kha music khawvela mi lian bik a ni," tiin George Martin ropui zia a sawi.