Evanescence 'Use My Voice' Lzze Hale, Taylor Momsen leh Sharon Den Adel-te'n an thawhpui

Evanescence chuan nimin khan Sony kaltlangin single thar 'Use My Voice' an tichhuak a, he hlaah hian thawhpuitu an hrawl hle.

'Use My Voice'-ah hian hmei­chhe rockstar eng emaw zatin an telpui a, chung zingah chuan Hale­­storm vocalist Lzze Hale, The Pretty Reckless frontwoman Taylor Momsen, leh Within Temptation vocalist Sharon Den Adel-te pawh an tel a, anni bakah hian Violinist Lind­sey Stirling, Amy Lee ṭhian hnai tak leh hla phuah puitu Veridia member Deena Jakoub, Amy laizawn Carrie South leh Lori Lee Bulloch-te leh Evanescence guitarist Troy McLawhorn nupui Amy McLawhorn-te pawh an tel a ni.

Evenescence single thar hi USA-a Headcount chuan vote thlak turte in register tura a campaign-na hla atan an hmang bawk. He hla hi khawvela rorelna dik a awm theihna tura ṭawng chhuahin thil a tih theihzia puanchhuahna tura phuah a ni a, Amy Lee chuan,"Tun hun hi harh tharna hun a ni. Midangte thudik zawng turin he hla hian a hneh ka beisei a, an duhna ngei zawng chhuak se, ka aw ka hmang ang bawk hian an aw chu hmang se ka duh. Midang i tana an ṭawng chhuah phal suh," tiin an hla thar chungchang hi a sawi.

Evenscence album thar tur 'The Bitter Truth' aṭanga an single tihchhuah pathumna a ni ta a, a hmain 'Wasted On You' leh 'The Game Is Over'-te chu an lo tichhuak tawh bawk a ni. Amy Lee hian hman deuh khan kumin chhung ngeiin an album thar hi tihchhuah an tum tih a lo sawi tawh a, anmahni music pangngai ang ngei kha a ni leh dawn tih a sawi tawh bawk. Tuna an single tihchhuah thar 'Use My Voice' pawh hi an fan-te chuan a 'Evanescence' leh hle an ti ngei ang.

Music video pangngai an la tichhuak lo a, audio chauhin an tichhuak a ni. Streaming platform hrang hrangah ngaihthlak turin a awm tawh a, "Kan hla thar tura thil phurawm ber pakhat chu kan ṭhiante'n min puihna hi a ni. Use My Voice-a in aw chak tak rawn thawhtu hmeichhe ropui tak takte chungah khan lawmthu kan sawi e," tiin an hla an tihchhuah hma hian Evenscence hian an sawi a ni.

Thla tir lamah khan Amy Lee hian Halestorm a lo pui tawh a, an hla 'Break In' an tihchhuah thar lehah a pui ve bawk a ni. Nakkum lamah hian Within Temptation leh Evenscence-te chu UK leh Europe-ah an tour dun dawn bawk.