Foo Fighters-in tour an ṭhulh

Foo Fighters chuan an kum 25 tlin lawmna puala tour neih an tum '2020 Van Tour' chu Covid-19 hri leng vangin an ṭhulh.

Foo Fighters hian ruahmanna an siam dan chuan October 1 aṭang hian Hamilton-a bul ṭanin tour hi neih an tum a, December 5 thleng neih an tum a ni. Mahse US-a Covid-19 hri lengin ziaawm lam a la pan mai loh avangin mipui punkhawmna lam huaihawt a la remchang lo a, hei vang hian an tour chu an ṭhulh tih an puang zui ta a ni.

Kum 1994 khan Foo Fighters band hi an indin a, he band hi Nirvana band  drummer Dave Grohl din a ni. Music lamah sulhnu an nei ngah tawh hle a, Grammy Award pawh 12 lai an la tawh. Band member hi paruak an awm a, member kal chhuak tawh pahnih William Goldsmith leh Franz Stahl-te an awm bawk.