LIVE NATION Charity Fund-ah rock band-te'n sum an thawh nasa

Music Forward Foundation chuan Crew Nation Global Relief Fund-ah sum $maktaduai 15 hmuh chhuah tawh a nih thu an tarlang.

Crew Nation Global Relief Fund hi hripui lengin a ngawng ram hrang hrang 36-a live music crew member 15,000 vel ṭanpuina tur a ni a, show ṭhulh leh sawn hlat avanga harsatna tawkte ṭanpuina tur a ni.

He charity fund hi Live Nation chuan bulṭanin $mtd 5 an thawh hmasa a, hemi match tur hian artist, fan leh hnathawktu dangte chuan sum an thawhkhawm a, $mtd 10 an thawh tling tawh a ni. Live Nation CEO leh president ni bawk Michael Rapino chuan," Concert hi stage hnung lama hnathawktu crew member-te tel lo chuan a hlawhtling thei lo a, chumi a nih avang chuan heng mite hian sorkar leh industry aṭangin support an dawn kan duh a ni," tia sawiin pawisa an dawn tawhte hmang chuan mi tam tak an ṭanpui thei tawh tih a sawi bawk.

Artist langsar tak takin Crew Nation Global Relief Fund-ah hian pawisa an chhung tawh a, chung zingah chuan Aerosmith, Coldplay, Backstreey Boys, Cher, Coldplay, John Mayer, Guns N' Roses, Metallica, Sum 41 leh Kid Rock-te pawh an tel.