Congress-in Mallya tanpuiah BJP a puh

Congress party chuan bank hrang hranga loan, cheng vaibelchhe 9,000 batu, Vijay Mallya ram pawn lam a tlanchhiat chungchangah BJP chu Mallya ṭanpuiah a puh.

Vijay Mallya hian bank 17 lakah loan vaibelchhe tam tak hi a ba a, heng bank-te hian Mallya hi India ram chhuahsan phalsak lo tura ngenin Supreme Court-ah petition pawh an lo thehlut tawh. Mahse Nilaini-a bank-te petition thehluh ngaihtuahnaah, sorkar laipui chuan Mallya hian India ram a chhuahsan tawh niin court chu a hrilh a ni.

Thubuai nei lai leh sum tam tak batu, Vijay Mallya-an India ram a chhuahsan chungchangah Congress party chuan BJP kaihhruai sorkar chu mawhphurtuah puhin a bei let. Nimina Lok Sabha inkhawmah pawh Cognress party chuan, "Bank hnena cheng vaibelchhe 9,000 batsaktu Vijay Mallya hi sorkarin engtinnge a tlanchhiat a phalsak theih?" tia zawtin, house aṭangin an chhuak tau a ni.

Congress vice president Rahul Gandhi chuan sorkar laipui chu rampawn lama sum chheprelh, black money lakkir tuma a intiam laia, vaibelchhe tel sum rutu a tlanbo tir leh si chu mak a tih thu a sawi. Hemi chungchang sawifiah tur hian Prime Minister Narendra Modi leh Finance Minister Arun Jaitley a phut bawk.

Rahul Gandhi chuan, "Prime Minister a ni hma khan Narendra Modi chuan black money te lakirin, kan bank account-ah cheng nuai 15 ṭheuh min dahsak a tiam tawh a ni. Mahse tun thlengin cheng khat pawh kan la dawng lo a, hetihlai hian cheng vaibelchhe 9,000 batu Vijay Mallya chu a tlanbo leh si a ni" a ti.

Media report chuan Mallya hi nimin khan London khawdaia a inah a awm niin an tarlang. Tiwen khuaa Mallya-a in hi Ladywalk tiin a vuah a, a awmna ram hi acre 30 chuanga zau niin Queen Hoo road-a in lian ber a ni. He in vengtute chuan Mallya hi inah a awm niin an sawi a, mahse a hnua media lamin an bawr tak hnuin a awm lo niin an sawi leh a ni. Mallya hian Tewin bakah Baker Street-ah in a nei bawk.

Finance Minister Arun Jaitley chuan Congress beihna hi chhangin, Mallya hnena loan pek chu Congress kaihhruai UPA sorkar lai a nih thu a sawi a, mahse Congress chuan loan petute chu bank an ni a, tunah bank-te hian an lakah dik lo taka thil a tih avangin an khing let a, hei vang hian NDA sorkar chuan India ram a chhuahsan chu a phalsak lo mai tur a ni, a ti.

Jaitley chuan Mallya-a leibate chu hmuh kir leh vek a nih theihna turin a ṭul angin hma an la a, bank-te pawhin theihtawp an chhuah mek tih a sawi.