Billboard 200 : No. 1-ah Blink-182 reunion album

Billboard 200 album chart-ah Blink-182 reunion album, 'One More Time' chu no. 1-ah a rawn lang. Rock band hian no. 1 ni thei album pathum an neihna a ni a, an album thar hian kar liam ta khan US-ah equivalent album unit 125,000 a nei pha.

Blink-182 in album chart chung ber dinhmun an luah theih hmasak ber chu kum 2001-a an tihchhuah, 'Take Off Your Pants and Jacket' tih kha a ni. Kum 10 chuang hnu, kum 2016-ah 'California' chu no. 1 rawn nihpui lehin, kuminah an rawn neih belh leh ta a ni.

Drake 'For All the Dogs' chuan equivalent album unit 120,000 neih belhin, no. 2-ah a la awm chhunzawm. No. 3-ah The Rolling Stones rawn lang tharin, an album thar 'Hackney Diamonds' chuan equivalent album unit 101,000 a nei.

Bad Bunny 'Nadei Sabe Lo Que Va a Pasar Manana' chu no. 1 aṭangin no. 4-ah a tla thla a, chart luah lum rengtu, Morgan Wallen 'One Thing at a Time' chuan Top 5 a rawn khar.

Billboard 200 chart-ah hian Taylor Swift chuan a album pahnih, 'Midnights' leh 'Lover' chu a la lanpui zel a, ani bakah Top 10-ah hian Zach Bryan self-titled album bakah Rod Wave 'Nostalgia' leh Olivia Rodrigo 'Guts' te an la lang chhunzawm bawk.