Deva-ah Kubbra Sait a chang dawn

Shahid Kapoor leh Pooja Hegde-te channa 'Deva'-ah 'Sacred Games' aṭanga rawn lar chhuak, actress Kubbra Sait pawh a chang dawn tih production house pahnih, Zee Studios leh Roy Kapoor Films chuan an puang leh. He film hi nakkuma tihchhuah tum a ni.

Shahid Kapoor leh Kubbra Sait-te hi a hmin web series, Farzi-ah an lo chang dun tawh bawk. Sait hian eng role ber nge a chan dawn tih erawh tarlan a la ni lo a, mahse, Shahid nena thawh dun leh chu a phur hle tih a sawi. 'Deva' hi Roshan Andrews-a'n a direct dawn a, Bollywood film a direct-na hmasa ber tur a ni. Malayalam cinema lamah erawh a hming a chher tawh hle a, South superstar Mohanlal, Prithviraj Sukumaran, Dulquer Salmaan, Jyothika, leh Manju Warrier-te pawh a lo thawhpui tawh.