India-ah WhatsApp account nuai 71 chuang tihtawpsak

Meta hnuaia WhatsApp chuan kumin September thla chhungin India ramah IT rules bawhchhiaa puhin account nuai 71.1 an titawp.

Report chuan Indian user zingah complaint awm avang te, sorkar dan zam palzut an awm tih report an dawn avangtein Grievance Appellate Committee (GAC) hriattirna angin action an la tih an sawi. September 1, 2023 - September 30, 2023 chhunga WhatsApp-in account a tihtawp hi 7,11,000 an ni a, heng zinga 2,571,000 chu user report an dawn kher loa tihtawp an ni.

WhatsApp chuan an platform himna chu an ngai pawimawh hle tih sawiin, inrikrapna, mawi lo taka chetna leh dawt thu thehdarhna atana hmangtute chungah action lak zel an tum thu an sawi. 'Accounts Actioned' tihah report an dawn bawhzuia action an lakna tur case hrang hrang pawh a awm thu an tarlang. Thil dik lo leh rinhlelhawm nia hriatte chu user-te pawhin an report thei a ni. Kumin August thla khan WhatsApp hian account mtd 7.4 a lo titawp tawh bawk

Feature thar enchhin

WhatsApp hian feature thar a siam belh zel a, tunah hian an app-ah YouTube ang deuha video playback button an siam thar leh a, mahse, hei hi WhatsApp beta bikah enchhin phawt a ni.

Feature thar, video playback control-ah hian user chuan video chu second 10 chhung rewind leh forward a ti thei a, hei hian video-a an duh lai bik en a tihawlsam phah dawn a ni. Hei bakah hian new privacy, 'Alternate profile' pawh an buaipui mek bawk. Hetah hian user-te chuan an profile photo-ah an contact list-a awm ve lo te hmuh tur, thlalak dang an hmang tel thei dawn a ni. Heng feature tharte hi a nawlpuiin an hman theih hun tur erawh an la sawi lang lo.