Arts line-ah zir theih a tam. Arts line-a kalte hian sum leh pai leh, nakkina hna awm tur ai mahin anmahniin nuam an tih leh an tuipui ber subject an thlang tlangpui Ṭhin

Nu leh pa leh mi tam tak chuan an fate leh mahni subject tur thlan dawnah kan buai ṭhin a, Arts lam hi chu lehkha thiam thei lo deuhte kalna tur âwmah kan ngai ṭhin a, a thiam deuh chuan Science emaw Commerce emaw zir turah kan ngai mai ṭhin. Mahse a ni hauh lo a, Arts-ah pawh hian subject a tam a, Mizorama la lar lo, hmun danga ṭha tak tak si a tam hle.

BA ringawt kan tam tawh a, core subject-a History, English leh subject lar dang zir chhuak pawh kan ṭhahnem tawh hle. Archeology te hi Mizo zingah a la lar lo hle a, Mizoram University hi chuan an la pe chhuak lo mai thei. Psychology hi tunlaiah chuan an ṭangkai ta hle a, hna hmuh pawh a awlsam. Social Work leh Psychology-a degree nei kawpte hi mi beidawng an tam tial tialah a hlu tial tialin a rinawm.

Bachelor of Business Administration hi Mizo zingah pawh a lar ve ta hle a, sumdawnna ṭhang zelah hemi lama kal hi an tam deuh deuhin a rinawm. Bachelor of Management Studies hi a la lar lutuk lo a, kum thum chhung zir ngai a ni. Bachelor of Fine Arts pawh hi kan la tam lo hle. Hotel Management pawh hi tunlai khawvelah chuan a hlawk ta viau a, zir chhuak kan la tam lo. Mizoramah huau huau programme a tam sawt ve ta viau a, sorkar pawhin kût leh hetiang kaihhnawih a buatsaih tam chho ta viau. Hetiang huna mamawh em em ṭhin chu Event Management-a degree nei an ni a, mahse kan la ngah lo a, kan la hriat lutuk loh avangin sorkar emaw pawl emaw pawhin an ṭangkaina kan la pawh lutuk lo a ni mai thei; hun rei vak loah an tel loin kan awm thei lo thuai ang.

Bachelor of Fashion Designing Course zir chhuak kan awm ta phauh phauh a, tualchhungah ringawt pawh eizawnna tling khawp a ni tawh a, Bachelor of Elementary Education (B.El.Ed) hi Mizotena kan hriat lutuk loh pawl a ni ang, kum li chhung zir a ni a, knowledge, human development, communication skill leh hetiang kaihhnawih hrang hrang an zir. Mi zirtirna lama tuite tan chuan hei tluk hi chu a awm kher lo mai thei. Hei bakah research leh social work lam atan pawha subject ṭha a ni. Bachelor of Physical Education-ah hian sport science, coaching leh outdoor education lamte thlur bik a ni a, university zawng zawngin he subject hi an offer lo. University ṭhenkhatah chuan graduate hnuah kum khat zir chauh anga dah a nih laiin, university ṭhenkhat hnuaiah chuan kum thum emaw kum li emaw zir ngai, class 12 pass hnu aṭanga zir theih anga dah a ni bawk.

Animation and Multimedia course hi a zir hun chhung university azirin a inrei hleih. Bachelor of Retail Management (B.RM) hi retail industry te tana ma-nagement leh market strategy lam zirna a ni. Bachelor of Travel and Tourism Management te hi tourism lama Mizoramin hma sawn zel a tum chuan kan la mamawh em em tur a ni. Subject pêng deuhte bakah hian History, Political Science te hi Competitive exam hmachhawn tumte chuan subject ṭhaa ngaih
ṭhin kha a ni a, subject dang pawh zir peihte tan chuan subject ṭha a ni vek. Mizoram sorkarin kum tin combined competitive exam a buatsaih tak avangin subject penhleh deuh ni lo aṭang pawhin hna a tam sawt hle.