Queen guitarist Brian May Heart Attack vangin a thi ṭep!

Queen guitarist Brian May chuan 'heart attack' vanga a thih ṭep thu sawiin, damdawi-inah an enkawl thu a sawi.

Brian May hi thla tir lamah khan a huanah a intina palh a, a 'glute' a tina nia a ngaih chu a rin aiin a lo serious niin a sawi. Hemi chungchang hi Instagram-ah tarlangin kum 72 lai ni ve tawh rock legend chuan heart attack vanga enkawl a ngai hial chu mak a ti hle zawk tih a sawi a ni.

Mi hrisel tak nia a inngaih thu sawiin, "Artery pathum chep taka awm ka lo neih reng avangin ka lung aṭanga thisen pechhuaktu tur chu chu chuan a lo dang ṭep a ni," a ti. Hemi vang hian zai a ngai hial a, a artery nek cheptu tihawng tur tube pathum vuah sak a nih thi sawiin, "Tunah chuan ka hriselna a ṭha leh tawh a ni," tiin a sawi bawk.

"Lung chak ṭha tak nen ka chhuak leh tawh a, hun eng emaw chen chu ka dinhmun a ṭha turah ka ngai," tiin a dam ṭhat tawh thu a sawi a ni.

Thla tir lamah khan a 'glute' tihrawl a tihnat thu chanchin chhiar tur a awm tawh a, MRI-te chu tiin a dam mai turah ngai mah se kar khat a liam hnu pawha a la dam loh avang chuan a ṭhiante chuan tihrawl na satliah nia a lan loh thu an hrilh a, hemi vang hian MRI dang a ti leh a ni. Hetah hian 'compressed sciatic nerve' a nei tih hmuhchhuah leh a ni a, hemi hnu hian  'heart attack' a nei tih hi medic lam chuan an hmuchhuak leh ta tih a sawi.

Mi tam takin khawvela guitarist ṭha bera an ngaih leh an ngaihsan rawn Brian Harold May hi a nu chu Scottish a ni a, a pa chu English a ni thung. Queen an din hma kum 1968 khan 'Smile' tih band a lo din tawh a, he band-ah hian Queen drummer 'Roger Taylor' pawh a tel ve nghe nghe. Mahse kum hnih lek hnuah an kehdarh leh a ni.

Kum 1970 khan Freddie Mercury nen intawngin 'Queen' hi an din a, Freddie Mercury kha 'Smile' fan hi a ni a, an show-ahte a kal ṭhin.

Guitarist ropui tak a nih piah lamah hian science lamah a tui hle a, astrophysicist a ni tel bawk. Kum 2005 khan Queen Elizabeth II chuan Most Excellent Order of the British Empire (CBE)-ah a ruat a, kum 2007 khan  Imperial College London aṭangin astrophysiciss-ah PhD a hmu a, kum 2008 aṭanga 2013 inkarah khan Liverpool John Moores University-ah Chancellor a ni hial.

NASA New Horizons Pluto mission atana thawktu science team zingah a tel tawh a,  aware­ness campaign Asteroid Day dinchhuaktu a ni. A hmingchawiin asteroid pakhat Asteroid 52665 Brianmay tih phuah a ni tawh a, animal rights activist a ni bawk.