Technical line-ah seat hnawh khah loh a tam

Mizoram hian engineering leh medical (Biology Group) chhung-ah nikum khan seat 350 vel kan nei a, Engineering (Mathematical Group) bikah seat 50 vel hnawh khah loh a awm. Seat hnawh khah loh heti zat a awmna chhan pakhat chu zirlaitena Mizoramin seat kan neihna college an duh loh vanga lut tura tling pawh an luh tak loh vang leh, a course vangte a ni.

Higher & Technical lam chuan Mizote zingah engineering bikah pawh Electronics leh Computer Science duh kan tlem ta deuh tih an sawi a, heng course-a seat kan neihte hnawhkhat zo khawp zir duh kan awm ta lo. Hetihlai hian Petroleum lamah seat khat nikum khan Mizoram chuan thawktute beihna avangin a nei thar bawk.

Biology Group lamah hian nikum khan Mizoram hian seat 222 a nei a, Mathematics Group-ah hian, Central-ah seat 121 leh NEC-ah seat 17 a nei bawk. Hei bakah hian Mizoram NIT-ah seat zaa 50 hi Mizoram chanpual a ni a, Mizoram chhung aṭanga class XII zir chhuak, ram leilung fa kher lote pawhin Mizoram NIT-ah hian seat an nei a, chutihlaiin Mizo naupang, state pawna zir chhuakte erawh a huam lo thung.

Mizoramin seat a neihna hmun phai ram zirna ṭha chang pha lo, zir duhte tan Higher & Technical hian zirna in ṭha, zirna tlak nia an ngaihte an ko chhuak ṭhin a, chungah te chuan Mizo zirlai, Mizoramin seat kan neihnaa chang lote tan zir theihna tur kawng a inhawng leh ṭhin.

Engineering seat central pool, seat 121 te chang tur emaw, lut thei tur hian JEE main exam a ngai a, November leh December thla chhunga form fill up tur a ni ṭhin a, April Pathianni hmasa berah exam buatsaih a ni ṭhin. Mizoram hian seat a neih sana a nih avangin JEE Main Exam-ah hian miin negative mark hmuin, thiam lo hle mah se, kan seat neihin a tlin huam chhunga tel an nih chuan an zir thei tho a ni. Amaherawhchu seat 121 chauh kan neih avangin thiam lo tak tan chuan seat chan a har khawp ang. JEE-a ti ṭha, IIT-a lut duhte tan JEE Advance exam leh theih a ni. Counselling hi July thla tawp lamah neih ṭhin a ni a, security deposit-ah cheng sing hnih dah a ngai ṭhin.

Biology Group hrang hranga seat-te tan hian State Entrance exam a ngai a, May thlaa exam
ṭhin a ni a, counseling hi H&TE Dept in June thlaah a buatsaih ṭhin a, Entrance-a tih ṭhat dan a zirin seat hi pek ṭhin an ni; exam zawng zawngte counseling ah koh vek ṭhin an ni. Mahni seat duh ang hmu lote tan seat channa form hmangin seat chan theih a ni a, hei hi a changte tih ṭhat dan a zira seat pek leh ṭhin an ni. Seat channa dah lote seat pek an ni ngai lo.

H&TE Office, Chaltlang chuan JEE (Main), JEE (Advance), AIPMT, NERIST, University of Hyderabad, AIPMT, CMC- Vellore, CMC- Ludhiana, NEIGHRIM, JIPMER, Datta Meghe –Wardha te hi online registration hrang hrang an tihsak thei a, seat zawn leh Counseling process thlengin an pui ṭhin bawk.

MBBS zir tur hian sorkar hnuai-a zirte tan chuan cheng sing nga vel a ngai a, private-a zirte tan erawh chuan cheng nuai 45 vel tal a ngai thung. BDS zir turin sorkar hnuaiah cheng sing hnih, private-ah cheng nuai 3.5, Agri, Horti leh a dangah te hian cheng sing khat vel sorkar hnuaia a ngaih laiin, private chuan cheng nuai 1.3 vel a ngai thung.