The Young Messiah Khawthlang Kristiante thlirna aṬangin

North America box office top 10-a lang pha, Kristian film anga chhal theih, The Young Messiah hi Bible-a kan hmuh bak thil, Isua naupan lai, kum 7 mi a nih vel lai chanchin a ni a, Kristian tam tak chuan an fak viau laiin Kristian dang ṭhahnem tak chuan he film hi an sawisel ve thung.

The Young Messiah film chungchangah khawthlang Kristiante ngaihdan a phir ang reng viau. Kristian tam tak chuan hetianga Kristian film dinhmun sang taka a rawn invawrh thei hi an ngaihlu viau a, Kristiannain US-ah hnuhma a la neih lenzia lantirna niin an ngai a, Kristian behchhan film a nih hrim hrim vang hian an fak hle bawk.

Kristian ṭhenkhat dang chuan mi ṭhenkhatin he film an lawm em em mai chu Kristian film hrim hrim chhuak mawlh mawlh se an duh vang niin an ngai ve thung. Bible zirtirna leh hlimthla aṭanga thil âwm lo tak tak awm an phawrh chhuak bawk.

The Young Messiah-ah hian Isua chuan Pathian Fapa a ni tih a la inhre lo a, amaha thiltihtheihna te chu a la hrethiam lo hle. Mahse Kristian ṭhenkhat chuan hei hi thil ni thei niin an hre lo a, Luka 2:52 thu aṭang chauh pawhin Isua khan a naupan lai aṭang tawhin Pathian Fapa a ni tih a inhre tawh a ni an ti thung. Hei bakah hian The Young Messiah-ah hian Setana chuan Isua chu nakkina mi pawimawh tur niin a hria a, mahse Pathian Fapa, khawvel chhandamtu tur a ni tih a hre lawk bik lo anga tarlan a ni; hei pawh hi Bible zirtirna pangngai nen chuan a inang lo.

He film hrim hrim Anne Rice lehkhabu ziak behchhana siam a ni. Anne Rice hian a lehkhabu ziakah hian apocrypha bu tia sawite zinga mi, Gnostic zirtirna thu eng emaw zat awmna, Kristianten hmanlai aṭanga Pathian thu bua an pawm ve leh, The Infancy Gospel of Thomas a râwn nasa tih a sawi. Hengte avang hian Kristian tam tak chuan he film hi rintlak lohah an ngaih phah a ni. Mahse Kristian mi thiamte chuan he film hi Bible kalh a ni lo a, Bible dodal film a ni lo tihah erawh chuan an thuthlukna a rual a, film hmuhnawm tak a ni tihah an lên tlak a rual bawk.