AC/DC mini-documentary 'The Forgotten Sydney Of AC/DC'

Australian rock band AC/DC mini-documentary film, 'The Forgotten Sydney Of AC/DC' chu mipui en theih turin an tichhuak.

Kum 1973 vel aṭang daih tawh khan AC/DC hian rock music khawvelah hming an chher tawh a, vawiin thleng hian an hla Back in Black, Thunderstruck, You Shook Me All Night Long, Whole Lotta Rosie leh an hla dang eng emaw zat chu a la lar hle.

'The Forgotten Sydney Of AC/DC'-ah hian an member hlui Dave Evans, Mark Evans leh midangte interview-na dah tel a ni a, hei hi a tihlutu pawh a ni ngei ang. He an documentary-ah hian 70's lai hawla an perform-nate dah lan a nih bakah, an lead guitarist, Angus Young-a'n Victoria Park Pool-a school uniform ha chunga guitar a zut laite pawh tilan a ni bawk.

Tunah hian GNR singer Axl Rose chu vocalist-ah an hmang mek a, ani hian kum 2016 aṭang khan AC/DC hi a pui a ni. An band line-up hi an thlak fo a, an vocalist kan hriat lar ber Brian Johnson-a'n band a chhuahsan hnu khan Axl hian a pui ṭan a ni. Kum 2017 khan an rhythm guitarist ṭhin Malcolm Young leh band dintu chu a thi tawh bawk. An vocalist ṭhin Bon Scott pawh kum 1980 khan a thi tawh a ni.

Kum 47 vel lai rock music khawvela sulhnu nei tawh AC/DC hian studio album 16 an tichhuak tawh a, kum 2014 khan an album hnuhnung ber 'Rock or Burst' tichhuakin ram 12 laiah chart No.1 an la nihpui thei.

'The Forgotten Sydney Of AC/DC'  hi YouTube-ah pawh thlir theihin an dah chhuak a, minute 18 vel leka sei ni mah se AC/DC fan-te tan chuan thlir manhla tak tur a ni.