India rama sum tamna hna

Hmanah chuan class X pass hi thil pawimawh tak a ni ṭhin a, tunah erawh chuan class XII hi hmalam hun tihchianna kawng peng ṭhuam a ni tawh thung. Class XII pass aṭangin lehkha kan zir pawhin job orien-ted an tih, nakkina hna la thawh tur hawi zawnga zir a ni ta. Hna lamah hian India ram ei leh bar dinhmun a ṭhat tak avangin hna a tam sawt viau a, chung hna zing-ah chuan hlawh tam lehzualna hmun bik a awm ṭhin.

Medical lamah hian hlawh a tam reng a, sorkar hnuaia awm emaw, mimal hnuai a ni emaw medical lamah hi chuan indaih loh a awm reng rih ang. India hi mihring 1000 zela chhuta doctor leh medical lam mithiam tlemna ram a ni. MBBS hi kan ngah ṭan ve ta viau a, mahse PG lam, special-na nei erawh kan la tam lutuk lo a, inzir hmuh chhoh zel a ni bawk. Mihring kan pung zel a, damdawi lam mithiam mamawhna a sang tial tial ang. Hetihruala kan hriat tur chu sum thawh chhuah hi kan zir chhan pawh a ni mai thei a, amaherawhchu thingtlang mi rethei leh inkalpawhna nei chhe zawkte dâwmkân leh an hriselna ngaih pawimawhsak hi mihring kan nihnaa kan mawhphurhna lian tak a ni tih hriat tel a ṭha.

Mizotena kan la hmelhriat tam em em loh, Merchant Navy Job lam hi an hlawh a ṭha. Mizoramah pawh nakkin lawkah chuan, Chhimtuipui kaltlanga sumdawnna kawng a tlang hunah pawh kan hmelhriat tur zinga mi a ni. Marine Engineer, Navigation Officer, Electro Technical Officer leh a dangte hi an hlawh a ṭha. Marine Engineer ni tur hian B.E (Marine) emaw B.Sc (Nautical Science) emaw zir a ngai a, a nih loh pawhin 10+2 zawh hnua Alternate Training Scheme for Marine Engineers (ATS) zir
aṭangin a luh theih.

Engineering line hi kan intihhmuh kan ti naa Petroleum, Chemical, Instrumentation and Control Engineering, Mechatronics Engineering te hi kan hawi tam loh lam a ni a, mahse hengte hi engtiklai pawha India pum huap pawha mithiam an inmamawh rengna hmun a ni a, an hlawh pawh a chhe ngai lo. Information Technology and Computer Science pawh hi technology-a hma kan sawn zelnaah chuan kan mamawh belh zel tur a ni. Genetic Engineering, Biotechnology, Agriculture Information Technology te pawh hi an hlawh a ṭha.

Commerce lamah chuan Chartered Accountants te hi an hlu a, ram pum huap pawha hna ṭha leh ropui a ni. Management lamah chuan MBA hi dahsan a ni a, Architect hi kan mamawh belh deuh deuhte an ni bawk. Indian Army-ah hian a lumuma luh tur emaw kan ti deuh ringawt a, officer chinte phei chu an hlawh a ṭha a, hamṭhatna dang an dawn a ṭha bawk. Class XII pass hnuah, Physics, Chemistry leh Mathematics-a chawhruala 70% hmu tling chinte tan apply theih a ni.