MSL Season 2 Halftime Dance Battle turin crew-te an inpeih ta

MSL khelh mekah nizan khan league stage an zo a, kar leh Thawhlehni, March 22 zan aṭang khian Semi-Final khelh a ni tawh dawn a, hemi zan aṭang hian MSL Halftime Dance Battle neih a ni tawh ang.

Halftime Dance Battle nei tur hian dance crew palite an inpeih tawh a, dance battle hmuhnawm tak kan hmu dawn. Dance crew tel tum 24 lai an awm a, chung crew te aṭang chuan crew pali thlan chhuah an ni ta a ni. Crew pahnihte hi chu nikum lamah pawh a thleng sang ber ber kha an ni a, kumin crew dang pahnih an rawn lang thar dawn a, a hmuhnawm hle ang.

Nerds of War: Nerds of War hi nikum MSL Season 1 Champion te kha an ni. Kumin hian an member an la thar a, original member 2 bakah a thar 3 an awm a, a tharte hi nikum MSL Crew - Myn’X leh Crazy Bee-a an lead choreographer ve ve bakah, Frozen Crew-a mi pakhat an lalut. Nerds of War 2016 member-te chu Naom Chhangte, Jammy Ralte, Zoi Pachuau, LRS Chongthu leh MSa Zote te an ni. Kumin hian Defending Champion nih ngei tumin an rawn bei leh dawn a ni.

Riborn Crew: Riborn Crew te hi Mizoram Best Dance Crew leh Got 2 Dance-ah te nihna sang tak chelh a, lo tel tawh ṭhin an ni. An original member 2 phaia hnathawka an awm avangin member thar an la a, nikum lama MSL-a Lay Up member ni ṭhinte la tharin, an member-te chu Marina Khawlhring, Zuala Hmar, Immanuel Sailo, Moimoii Hmar, Chhandami leh Priscilla Hmar te an ni. An member-te hi dance experience ngah vek an ni a, an team work-a ṭhat chuan a sang ber pawh an nih theih ngei rin a ni.

Emerge Crew: Emerge Crew te hi nikum MSL Dance Battle-a mipui lawm hlawh ber te kha an ni. An crew hi Mizo Crew-a ding chang leh senior ber pawl an ni. An style hi a dangdai a, Mizo hla an hman ziah ṭhin te leh an entertainment package vang hrim hrim hian an lam hi en leh a chakawm tawh hle. Nikuma an member palite bakah Season 1-a Monadikos-a an lead an la thar a, member te chu Bernadette Vanchhawng, Robert Lalnunsanga, Lalduhsanga, David Lalrinpuia leh Kimkimi Chawngthu te an ni. A hma zawng aia ṭhaa rawn chet a, chak ngei an tum.

Asterix Crew: Asterix Crew te hi MSL atana hmel thar an ni a, an crew tak hi chu an dinna a lo rei ve deuh tawh a, an perform nual tawh bawk. Tunhnai Chapchar Kut Night, Valley View-a Dance Competition-ah khan pakhatna an ni a, Zemabawk aṭanga rawn kalin, an member te chu Johny Lalremtluanga, Tinichi Tea, Romie Zosangpuia, Lalrinsanga leh Ramchhuanmawii te an ni. An crew rawn chetla tur hi en a chakawm tawh hle a, hmel thar daihin tun MSL Dance Battle Champion trophy hi an rawn chawi thei ang em tih hi nghakhlel taka kan lo thlir tur chu a ni.