Khawvela ram hlim ber Denmark

UN-in a tihchhuah, World Happiness Report-ah chuan Scandinavia ram pakhat, te tak te, mihring pawh maktaduai 5.6 chauh awmna Denmark chu a hmasa ber an ni a, khawvela ram hlim ber a ni.

Denmark hi an ram economy a ṭha a, vantlang tana ruahmanna ṭha tak sorkarin a siam avang te, hlemhletna lama a fihlim avangtein pakhatna dinhmunah a ding. Gross Domestic Product pawh a sang a, sum leh paiah an dinhmun a
ṭha bawk.

Ram hlim ber dawttu pawh Scandinavia ram pakhat, Norway a ni. Mipuite he ramah hian an zalen a, mipui mamawh thil engkim a hnianghnar a, hei hian ram hlimah a siam a ni. Switzerland chu pathumna a ni a, he ram hi ram vannei leh ram nuam a ni. Hlimna lamah kher ni lo, ram nuam leh ṭha tehna hrang hrangah Switzerland hi top 10-ah a lang thei zel.

Netherlands chu palinaah lang phain, GDP per capita-ah an sang a, himna lamah lah nise mipui an him a, khawtlangah lah hlauhthawn tur a awm lo. Sweden chu pangana a ni a, Canada chu parukna niin, Finland chu pasarihna, Austria pariatnaah, Iceland ram chu pakuana nii, Australia chu 10-na an ni.

Ram hlim lo ber thung chu Africa-a Burundi a ni a, a dawtah Suria, Togo, Afghanistan leh Benin ten an dawt. Burundi-ah hian mi pakhatin kum khat chhunga a sum lakluh hi USD 770 chauh niin, mi pakhat dam rei zawng hi kum 56 chauh a ni.

Europe ramte ram hlimah a chungnung ber deuh vek an ni a, Europe-a ram hlim lo ber chu Bulgaria niin, 129-na a ni a, Greece chu 99-na niin, Portugal chu 94-na a ni thung. US pawh ram hlim zinga mi niin 13-naah a lang. Asia-ah chuan UAE chu a thleng sang ber niin 28-na a ni a, India chu 70-naah a lang. Bhutan, Ecuador, UAE leh Venezuela-ah te chuan a ram mipuite an hlimna kawnga hma latu tur bik minister a hranpain an nei.