BtoB-in an contract renew dawn lo

South Korea boy band, BtoB chuan trademark chungchangah inhriatthiam lohna an neih avangin Cube Entertainment nena an contract siam chu renew an tum tawh lo.

BtoB member-te hi an trademark atana Cube Entertainment-in sum a phut chungchangah an lungawi lo a, inremna siampui tumin inbiaknate neihpui mah se, an inrem thei lo a ni. Cube Entertainment hian BtoB hian an trademark an hman atan hian an team sum hmuh aṭanga eng emaw zat a phut a, a phut zat chiah hi puanzar a ni lo thung. BtoB hi kum 2012-a Cube Entertainment hnuaia din a ni a, a tirah chuan member pasarih awmin 2020, December thla khan an member pakhat Jung Il-hoon a chhuak a, tunah hian member paruk an ni mek. Kum 2012 khan an EP hmasa ber, 'Born to Beat' tichhuakin, 2015-ah full-length album hmasa ber 'Complete' an tichhuak. Award pawh ṭhahnem tak an dawng tawh bawk.