Grammy Awards 2024 SZA-i'n nomination hmu hnem ber

Recording Academy chuan 2024 Grammy Awards neih tura nomination chu official-in a puang a, category ngaihhlut zual zingah mipa aiin hmeichhe artist an langsar. SZA chu caterogy pakuaah nominee niin, nomination hmu hnem ber a ni.

Nakkum February 4-a sem tur, 2024 Grammys-ah hian category thar pathum - Best African Music Performance, Best Alternative Jazz Album leh Best Pop Dance Recording telh a ni. Hei bakah organiser-te chuan rules thar siamin, category tina nomination awm thei zat chu 10 aṭangin pariatah an titlem bawk.

SZA dawtah hian Phoebe Bridges awmin nomination pasarih a hmu a; Taylor Swift, Billie Eilish, Miley Cyrus leh Olivia Rodrigo-te'n dawt lehin nomination paruk ṭheuh an hmu.

Tun ṭum Grammy nomination-ah hian country star lar, US-a best selling-artist ni thei zinga mi, Morgan Wallen a lang lo leh a, hei hian sawi zui pawh a hlawh hle. Kum 2021 khan Morgan Wallen hi chi inthliarna lam hawi thu a sawina video a darh hnuah, award show eng emaw zat aṭangin diqualify a ni a, Grammy nomination-ah pawh a best selling album, 'Dangerous : The Double Album ' pawh a lang ta lo bawk a ni.

Taylor Swift 'Anti-Hero' chu song of the year nomination-ah a lang a, he category-a nomination a hmuh ṭum sarihna a ni ta. Ṭum ruk nomination lo hmu tawh, Sir Paul McCarney leh Lionel Richie-te khumin song of the year-a nonimation hmu ngun ber record a siam.