Ṭhazual Award 2023-a perform turte a hriat ta

9th Ṭhazual Award, 2023 chu November 23 leh 24-ah sem a ni dawn a, kar liam ta khan nomination puan chhuah a ni tawh a, award sem huna perform turte pawh hriat an ni ta. Tunlai Mizo rimawi khawvela mipui ngaihven hlawh ber berte che tla kan hmu thei dawn a, mit leh beng a tlai leh hle ang.

Award hi Gospel leh Lengzem category-ah ṭhen niin, November 23-ah Gospel award hi sem a ni ang a, November 24-ah Lengzem award sem a ni thung ang.

Gospel Award neih zanah Gospel artist lar rual zai kan ngaithla thei dawn a ni. Zaia rawngbawlna lamah pawh sawm hlawh tak vek - Mizo Idol star Tumtumi, Maruati, Duhsaki, Zorema Khiangte, Jonathan Lianhna leh Arini-te bakah, zai intihsiakna hrang hrang aṭanga rawn invawrh chhuak - Mali, Ruati leh Isaac te pawh an rawn perform dawn.

November 24, Lengzem Award zana rawn che turte pawh duhthusam an ni e. Tleirawl lama tla na tak Ruatpuii, zai chhiat nei ngai lo Sangtei Khuptong, aw mawi dangdai tak nei Lilac, a hla thar apiang hit-pui thei zel Young Fella; mipuite rawn barakhaihtu zaithiam dangdai, H.O.M (Lude), leh an thiamzia sawi nawn ngai lo Evenflow-te che tla tur hmuh an chakawm tawh. Mary Dawngi leh Saiwanah pawh an rawn lang dawn. Anni bakah Mizo Idol 2022 star, Saka & Hmangaihi leh David Darlong-te pawh an che leh dawn e.