Ryan Gosling hnenah Kirk Douglas Award hlan dawn

Santa Barbara International Film Festival chuan Hollywood star, kumina movie hit ber 'Barbie' movie-a Ken-a lema changtu, Ryan Gosling chu Kirk Douglas Award for Excellence in Film dawng turin a thlang.

Nakkum January 13-a Santa Barbara, California-a Rizt-Carlton Bacara-ah he chawimawina hi hlan a ni ang. Kirk Douglas Award for Excellence in Film hi cinema lama thawk ṭha, a changtu lam emaw a film siamtu lam emaw hnena hlan ṭhin a ni. He award lo dawng tawh zingah hian Michelle Yeoh, Martin Scorsese, Hugh Jackman, Judi Dench, Warren Beatty, Jane Fonda, Jessica Lange, Forest Whitaker, Robert De Niro, Michael Douglas, Harrison Ford, Quentin Tarantino, Ed Harris leh John Travolta-te an tel. 39th Santa Barbara International Film Festival hi nakkum February 7-17 chhungin neih a ni ang.