Box Office: No. 1-ah beisei phak lo 'The Marvels' a lang

North American box office-ah superhero movie thar, 'The Marvels' chu no. 1-ah a rawn lang.

'The Marvels' hian no. 1 dinhmun hauh mah se, Marvel Cinematic Universe (MCU) film siam tawha tlangzarh kara sum la lut tlem ber a ni. Kum 2019-a tihchhuah, Captain Marvel film-in tlangzarh kara a sum lak luh hmun thuma ṭhena hmun khat pawh a la lut pha lo. Mahse kar liam ta chhungin film tlangzar langsar dang an awm lo a, box office-ah pawh a chung berah a rawn awm thei a ni.

International lamah pawh Brie Larson, Iman Vellani leh Teyonah Parris-te channa, 'The Marvels' hian an beisei ang a pha lo hle. Territory 51-ah tihchhuah niin, USD mtd 110 hmuh theih an inbeisei laiin USD mtd 63.3 chauh a hmu chhuak pha a ni. He film production budget hi USD mtd 274.8 niin, MCU film siam zinga budget sang palina a tling pha.

'The Marvels'-in beisei a phak lohna chhan pakhatah hian actor-te nawrh huaihawt avanga promotion a ṭhat tawk loh vang nia sawi a ni. Kum 2008-a Iron Man an tihchhuah aṭangin, MCU hian Hollywood-a franchise hlawhtling ber a lo siam tawh a, movie 33 an siam aṭangin USD tld 29.7 zet an la lut thei a ni. Film hlawhtling zual dangte chu Star Wars (USD tld 10.3) leh James Bond (USD tld 7.9) te an ni.

Horror movie, "Five Nights at Freddy's" chu no. 2-ah awmin, USD mtd 9 a lak luh belh leh a, "Taylor Swift: The Eras Tour" chuan USD mtd 5.9 la lutin no. 3-ah a awm. Top 5-ah hian "Priscilla" leh "Killers of the Flower Moon" te an lang bawk.