Stephenie Meyer lehkhabu thar 'Midnight Sun' hralh a kal

Robert Pattinson leh Kristen Stewart-te'n an larpui em em 'Twilight' lehkhabu ziaktu Stephenie Meyer lehkhabu tlangzarh thar Twilight' compa­nion novel 'Midnight Sun' chu lehkhabu dawra zawrh chhuah a nih aṭanga kar khat chhungin copy maktaduai chuang hralh nghal a ni.

'Midnight Sun' hian The New York Times Bestseller List-ah ro a rel nghal a, Twilight fan-te khan Twilight Saga kha an lo la kham lo hle tih a hriat. Stephenie Meyer hian a lehkhabu tharah hian vampire love story kha a rawn thar thawh leh a, mahse Bella Swan lam aṭanga thlir tawh loin Edward Cullen thlirna aṭangin a ni thung a, thawnthu thar hlak ni lo mah se chhiartute chuan an ngaihven nghal hle a, publisher Hachete Book Group leh Little, Brown Books for Young Readers-te chuan Ningani liam ta khan copy maktaduai chuang an hralh tawh tih hi an tarlang a ni.

'Midnight Sun' copy hralh zatah hian a physical copy chiah an chhiar lo a, pre order, print chhuah an hralh zat, ebook leh audiobook-te an chhiar tel vek a ni. Tunah hian  New York Times' Children's Series list-ah No.1 a ni mek a,  international bestseller ni mek bawkin U.K., Brazil, Holland, leh Germany-ahte lehkhabu hralh kal ber a ni bawk. "Hun mak tak kan tawng mek a, lehkhabu tlangzarh hun tur a ni em tih pawh ka hrethiam chiah lo. Mahse mi ṭhenkhatin rei tak in nghak tawh tih ka hria a, chumi avang chuan nghah tir reng che u kha thil dik niin ka hre lo," tiin Meyer chuan a lehkhabu thar tihchhuah chungchang hi a sawi. 'Midnight Sun' hi kum 2008-a tlangzarh a tum tawh kha a ni a, mahse a manuscript copy internet lamah a leak avangin kuminah hian a tlangzarh ta chauh a ni.