Billboard 200: Jungkook 'Golden' in Taylor Swift luahlan zo lo

Billboad 200 album chart-ah BTS Jungkook solo album hmasa ber, 'Golden' chuan '1989 (Taylor's Version)' a rawn luahlan zo lo. Taylor Swift hian a kar hnihna atan a album hi no. 1 a nihpui chhunzawm.

'1989 (Taylor's Version)' hian a kar hnihaah US-ah equivalent album unit 245,000 nei lehin, a hla 36-te chuan on-demand official steram-a mtd 159.54 an nei pha bawk.

Jungkook solo album, 'Golden' hian equivalent album unit 210,200 a nei a, no. 2-ah a awm. Chart-ah hian a la chet ṭhat chhoh zel a rinawm. An group, BTS khan album chart-ah hian Top 10 lang thei pasarih neiin, no. 1 dinhmun hauh thei paruk an nei a ni.

Top 5-ah hian no 1 lo ni tawh vek, Drake 'For All the Dogs', Morgan Wallen 'One Thing at a Time' leh Bad Bunny 'Nadie Sabe Lo Que Va a Pasar Manana' te an awm bawk.

Kumin September 1-a boral, Jimmy Buffett studio album hnuhnung ber 'Equal Strain of All Parts' chu no. 6-ah a rawng lang a, he album-ah hian Emmylou Harris, Angelique Kidjo, Lennie Gallant, Will Kimbrough, Preservation Hall Jazz Band leh Paul McCartney-te a thawhpui a, Billboard 200 chart Top 10-ah lang thei album 14 a neihna a ni.