32nd Lelte Award sem dawn

32nd Lelte Award, 2023 chu zanin leh naktuk zanah sem a ni dawn ta. Zonet, LPS leh Lelte YouTube channel-ah live-a pek chhuah a ni ang.

Zorimawi khawvel zai mi, hla phuahtu, musician leh talent nei ṭha tak takte tana buatsaih, Lelte Award hi kum rei tak hlawhtling taka kalpui a lo ni tawh a ni.

Kuminah hian award hi 43 sem chhuah a ni dawn a, zan hnihah sem tur niin Gospel Night leh Lengzem Night-a ṭhen a ni. Zanin dar 7 hian Dawrpui Multipurpose Hall-ah Gospel category-te sem a ni ang a, naktuk zanah a hmun leh a hun ngaiah Lengzem pual sem tum a ni. Host hi Janis Hnamte a ni dawn a, award semnaah hian zaithiam lar tak takte an perform dawn bawk.

Award semnaah hian kum tina an lo thlan ṭhin, Lifetime Achievement award chu C. Lalzuia leh C. Vansanga hlan an ni dawn a, Artist of the Decade - H. Vanlalhlana, Young Achiever Award - Escape Engmawia, Writer of the Year - Lalhruaitluanga Chawngte, Special Award - Lalthara IAS (Retd.) leh WB Manner-te hlan an ni dawn. Hei bakah hian Chibil Award hi Hmar, Thado, Paihte, Darlawng, Mara leh Lai aṭangin an dawng dawn bawk a ni.