China-in khawvela Internet chak ber pe chhuak : Second khatah data 1.2 terabits a transfer thei

China company-te chuan khawvela internet network chak ber an pe chhuak a, second khat chhungin high-definition film 150 hu data a transfer thei.

He project hi Tsinghua University, China Mobile, Huawei Technologies, leh Cernet Corporation-te thawkhoin an siam a ni. Optical fiber cabling system hmangin km 3,000 huam chhung, Bejing, Wuhan leh Guangzhou-te thlunzawm phawt a ni. Second khat chhungin data hi 1.2 terabits (1,200 gigabits) a transfer thei. Khawvela internet network chak ṭhate hi a tlangpuiin 100 gigabits per second a ni hlawm a, US-in tun hnaia fifth-generation Internet2 a siam pawh 400 gigabits per second a ni.

Huawai Technologies vice-president, Wang Lei chuan an network thar chak dan a sawi fiahnaah, second khat chhungin high-definition film 150 hu data a transfer hman a ni, a ti. FITI project leader, Wu Jiang chuan superfast line an siam chu operation hlawhtling tak a ni ringawt lo a, China-in internet chak ber siam tura technology lama an hmahruaina a lantir a ni, a ti.

Beijing-Wuhan-Guangzhou connection hi Future Internet Technology Infrastructure (FITI) hnuaia siam niin, he project hi kum 10 an kalpuina a ni tawh a, an system software leh hardware zawng zawng hi an ram chhunga an siam vek a ni.