Prince Harry leh Meghan Markle-te'n King Charles an biakna leak

Prince Harry leh a nupui, Meghan Markle-te'n King Charles pian cham vawi 75-na lawmpuina hlana phone-a an biakna chu an leak vangin sawisel leh dem an hlawh leh hle.

British lal chhungkaw lam hnaite chuan Prince Harry-te nupa chu an phone call an tih-leak chungchangah 'mi verther' tak nia sawiin, "Harry leh Meghan-te chuan an duh hunah privacy an mamawh tiin an sawi vak a, mahse, Prince Harry-a'n King a biak chungchang chu newspaper-ah a rawn lang nghal si a ni," a ti. Harry leh British lal chhungkua inkar boruak a ṭhat loh hnuah, King Charles-a birthday-a an inbiak hi phone hmanga an pafa inbiak lehna hmasa ber nia sawi a ni. Harry-a'n a lehkhabu, 'Spare' a tihchhuahah a chhungte leh a nuhrawn, Queen Camilla sawiselna hrang hrangte a dah avangin a pa nena an inkar hi a chhe zual a ni. A unaupa, Prince William nen phei chuan an inbe hlei thei tawh lo nia sawi a ni bawk.