2023 Billboard Music Awards-ah "All I Want for Christmas Is You"

Queen of Christmas tia sawi ṭhin, Mariah Carey chuan 2023 Billboard Music Awards-ah "All I Want for Christmas Is You" a perform dawn a, award show-a he hla a perform-na hmasa ber tur a ni.

November 19-a neih tur, Billboard Awards-ah hian Mariah Carey hi he hla avang hian Billboard Chart Achievement Award hlan a ni dawn bawk. Kum 2019 aṭang khan "All I Want for Christmas Is You" hi Krismas vuakvetah kum tin Billboard Hot 100-a no. 1 a la kai ziah a, Billboard flagship chart-ah kar 12 chhung no. 1 ni bawkin, Carey-in no. 1-a kar 10 chuang awm thei no. 1 a neih zinga pathumna a ni. Mariah Carey hian Merry Christmas One and All tour a nei mek.

"All I Want for Christmas Is You" hi Mariah Carey studio album palina leh holiday album hmasa ber, 'Merry Christmas' ami niin kum 1994-ah a tichhuak a ni. He hla hi Carey leh a songwriting partner, Walter Afanasieff te phuah niin, hla phuahna atan hian minute 15 chauh hun an hmang nia sawi a ni.

A single hi October 29, 1994 khan Columbia Records chuan a tichhuak a, a hlawhtling nghal hle. US-a Billboard Hot Adult Contemporary-ah no. 6 niin, UK leh Japan-ah no. 2 a ni nghal bawk. Hemi hnu hian kum tin December thlaa hla lar ber zingah a rawn tel chho ta zel a ni. He hla bik hi khawvel pumah copy mtd. 16 chuang hralh tawhin, best-selling digital singles of all time-ah pawh a tel. Library of Congress, Washington DC chuan kuminah National Recording Registry-a dah turin a thlang nghe nghe a ni.