Michael W. Smith
Tumkau Ni, tun Pathianni kalta khan FOX TV chuan The Passion Live programme an buatsaih a, he programme hi musical programme niin, Chris Daughtry te, Seal te, Michael W. Smith te, Trisha Yearwood te an zai a, Isua thih dawn hnai, darkar hnih vel chhunga chanchin an chang a ni. He programme hi Gospel artist lar leh hlawhtling Michael W. Smith chuan a hlawkpui hle.
Michael W. Smith hian Isua zirtir pakhat lem a chang a, "Ka role play hian a lian vak lo nain a pawimawh hle a, hetiang role-a ka lang thei hi ka lawm hle nghe nghe. Hei bakah hian ṭhian ṭha tak takte ka hmu a; Jencarlos Canela, Latin pop star chu Isua lemah a chang a, Prince Royce chu Petera lemah a chang a, ani pawh Latin pop star bawk a ni...heng mite nen kan inkawmngeih zui ta hi a ropui hle. Kar khat chhunga kan hna ber chu Isua leh a zirtirte nih kha a ni," a ti.
He programme hi New Orleans, Louisiana-a an chan a ni a, Smith chuan The Passion Live hi thlarau lamah pawh a hlawkpui hle tih a sawi a, Isua leh a zirtirte lem an channa aṭang han Isua tuarna leh kan tana a inpekna tam tak a hriat-chhuah leh phah tih a sawi bawk.
Jancarlos Canela chuan he film-ah hian Isua lem a chang a, Prince Royce chuan Petera lem changin, Chris Daughtry chu Juda lemah a chang. Trisha Yearwood chu Mari angin a inlan a, zaithiam Seal chu Pontia Pilata lem niin, Michael W. Smith hi zirtir lemah a chang bawk. Tunlai mil taka chan a ni a, Rom sipai, ngunhnam nena inthuam aiah police an lang tawh zawk.
The Passion Live hi a buatsaihtute chuan an chhuang a, entute pawhin an hlut hle. Kristian leh Kristian lote pawhin ṭha an ti hle a ni. Music producer Adam Anders chuan, "The Passion hi project hrang hrang ka telh tawhnaah chuan ka phurna ber leh nuam ka tihna ber a ni hial ang," a ti.
FOX-in hlawhtling taka Kristiante rilrem zawng The Passion an tihchhuah theih lai hian ABC chuan 'Of Kings and Prophets' chu episode hnih an tihchhuah hnuah an titawp. Thuthlung Hlui behchhana an siam hi sex leh violence lam an lantir nasa deuh a ni ang, an sawisel nasa a, chuvang chuan an titawp rih ta a ni. Parents Television Council chuan hetia mipui nawlpui hmuh chi loh thil a tam tak avang hian he film behchhana fakna tichhuaktu, advertiser te hnenah warning an pe a, chuvang chuan an inhnukdawk hlawm bawk.