Bethsy-i Delhi aṭangin a rawn haw Isua tuarna lam video neih ngei a tum

Maundy Thursday a ni a, mi tam tak chuan anmahni khaw lama Good Friday leh Easter Sunday hman tumin an haw a, Bethsy Lal-rinsangi pawh nimin khan Delhi aṭangin Aizawl a rawn thleng a, mahse Lungleiah erawh a phei hman hmel ta lo. Bethsy-i hian Good Friday pual emaw, Isua tuar-na lam hawi music video la siam ve ngei a tum.

Bethsy hian Isua tuarna lam hla a nei tam lo a, music video phei chuan a la siam chiah lo. Hetiang hi a nih avangin fakna hla satu lar hian Tuarna lam hla neih ve ngei a tum a, mahse tunhnaiah erawh chuan a siam nghal mai a rinawm lo a, nakkum Good Friday pualte hi chuan a neih ve a rinawm tawh viau.

"Good Friday hi ka ngai pawi-mawh hle a, kan tana Isua a tuarna leh min tlanna ni a ni a, chu chu he ni hian min hriatchhuahtir
ṭhin. Ka tan chuan Isuan min tlanna hi a pawimawh lehzual hle a, amah avangin tunah mi pang-ngai tak, Chanchin Ṭha êng hnuaia leng thei ka nih phah. Mite anga dinhmun ropui taka ding ni lo mah ila, tun dinhmun ka thlen theihna chhan hi Isuan min chhandamna vang a ni tih ka hrechiang a ni," a ti.

Delhi-ah hian Delhi Mizo Inkhawmin an buatsaih Spring Festival neih a ni a, hetah hian Bethsy-i hi a zu zai a ni. Kar kalta Zirtawpni zan khan Delhi-a Spring Festival-ah hian concert neih a ni a, hetah hian Bethsy-i hi a zai a ni. He Spring Festival-in a tum chu Delhi-a awm Mizo ṭhalaite Pathian lam an hawi theih nana kaihhruai a ni.