Mizo Idol 2015 Rebecca a music video hmasa ber chu hei le
Kumin chhungin hei bak Rebecca music video dang kan hmu tawh lo mai thei
Mizo Idol 2015-a pakhatna, Sairang nula, Rebecca Zorintluangi kha Mizo Idol hnu khan a reh ta vang vang a, mahse a reh rei lo, a music video hmasa ber chu a rawn chhuak ta.
Programme lian tham lutuk loah chuan a inlan zeuh zeuh fo a, Idol hnua zai lama hma a sawn nasatzia hi sawi chhuah a ni fo, chu chu tun a music video hmasa berah hian a chiang dawn a, kan hre dawn a ni. Rebecca Zorintluangi music video hmasa ber hi 'Kraws mak tak chu' tih hla a ni a, Mavuana lehlin niin, Blue Wave-a record a ni a, video hi SVP kutchhuak a ni thung.
Zawhna tam tak a awm a, a music video kan beiseina a rei tawh nen a va chhuak harin a va siam har ve kan ti mai thei a, mahse zirlai a ni a, hun a nei tawk lo. Rebecca chuan, "Mizo Idol tinsiak intihsiak a zawh hnu lawk khan hostel-ah ka awm zui lehnghal a, hei vang hian thildang ka buaipui hman lo a ni. Regular taka class kal a ngai a, theihtawpa zir a ngai bawk si a, chuvang chuan ka siam lawk hman lo a ni," a ti. Pachhunga University College-ah lehkha a zir mek a ni.
Music video pawh hi uluk theihtawpin, hun hmang tlem thei ang ber sia siam a ngai a, hun a chep hle a ni. Pachhunga University College hosteller ten nasa takin an pui a, a nu leh pa ngei pawhin an pui nasa hle. Hei mai bakah a chhungkhat hnaivaiten a music video atan hian theihtawp an chhuahpui bawk.
Hun a chêp a, chutiang kara buatsaih a nichungin "Video hi a ṭha ka ti a, chumi piahlamah chuan he hla hi ka duh em em a ni," a ti. "Pathian fakna leh amah chawimawina a ni a, Pathian pawhin a hman ngei ka ring a, a ropuina puan chhuah a nih ngei ka beisei a, chutiang tur pawh chuan Pathianin mal a sawm ngei ka ring," a ti bawk.
'Kraws mak tak chu' music video a tihchhuah hian hla dang erawh a hrin belh zel dawn lo a nih hmel. Hmachhawp leh eng emaw tum a nei em tih zawhna chu Rebecca hian, "Kuminah chuan nei tawh rih lo," tiin a chhang. Rebecca hian a zirna lam a ngai pawimawh hmasa ber a, chumi lamah chuan a rilru pawh sawrbing rih a duh. Music video hmasa ber kan hmuh hi kumin chhunga a music video awm chhun a nih hmel riau.