TBCA hla thar 'Isua lalber a ni'

TBC Zaithanpuia chuan kumthar thutiama Pathian Fakna hla chauh sak a tum tawh tih a sawi chhuah nemngheh nan fakna hla thar a rawn tichhuak leh ta a, a hla thar hi 'Isua lalber a ni' tih a ni.

TBCA hian Pathian khawngaihna leh malsawmna a dawn nasatzia a thlirin a tana a tih theih awm chhun chu a talent, Pathianin theihna a pêk, zai hmanga chawimawi a ni a, chuvang chuan tunhmaa kan hriat tirha leikapui zai thiam tak ṭhin khan Pathian fakna hla chauh sak a tum tawh a ni. Chumi tihhlawhtlin zelna atan chuan Isua lalberna chu hlain a rawn puang chhuak ta.

A hla thar hi Thankhumi, Chhinga Veng lehlin a ni a, Ace Records-a record niin, RDS-in video an khawih. TBCA tan chuan he hla hi a hlu zual hle a, "Ka testimony hla a ni" a ti hial. "Lei lalte aiin leh leh van lalber Isua hi kan hlauh tur dik tak chu a ni," a ti a, "Isua hi lalber a nihzia he hla hian ka thinlungah min hrilh nawn awn awn a ni," a ti.

"He hla thu hi ropui ka ti tak zet zet a, ka nun a hnehin, a thluk nen pawh a inrem hlein ka hria," tiin TBCA chuan a hla thar chanchin hi a sawi. "Khawvel leh a chhunga awm zawng zawngte leh lei lal zawng zawngte lal chu Isua Krista hi a ni a, lei lalte angin Isua Krista chuan kan thinlungah lalna hmun a chang leh ṭhin si lo a ni. Leia lalte mah kan tlawnin kan hlau a, an duhzawng tihsak kan tum ṭhin. Khawvel chhandamtu, kan tana thi khawp hiala thing anchhe dawng krawsa khenbeh Isua Krista tan erawh kan nung chhuak tak tak si lo," a ti.

TBCA hian kan nuna Isua kan laltir lo leh, amah aia khaw-vel thil kan hlau zawk leh zah zawk ṭhin chu a vei a, hlauh tur leh tlawn tur dik tak zawk chu Isua Krista a ni tih hi he hla, 'Isua lalber a ni' hmang hian miten hria se a duh a ni. "He hla hmang hian Isua chu kan thinlungah lalber a lo nih ngei theih nan he fakna hla lo ngaihthlatute zawng zawng hnenah Pathianin min min sawmsak hi ka duh ber a ni," a ti.