Ṭhazual Award 2023 host tur Zonuni Pachuau

Mizoin show host kan neih ṭhat ber zinga mi, Zonuni Pachuau chu Ṭhazual Award 2023 host atan thlan a ni.

Show hlawhtlinna leh tihmuhnawmtu pawimawh tak pakhat chu host hi a ni. Show hrang hranga a host thiamzia kan hmuh leh hriat tlan tawh, Zonuni kaihhruaina hnuaiah Ṭhazual Award 2023 boruak a nuam leh dawn tih a chiang e.

Zonuni hian kum 2021 leh 2022 khan Ṭhazual Award hi Gospel zan ve ve a lo host tawh a, kuminah erawh a kengtlang dawn a, Gospel leh Lengzem zan a host dawn a ni. Ṭhazual Gospel Award hi November 23 zanah sem a ni dawn a, November 24 zanah Lengzem Award sem a ni thung ang.

Ṭhazual Award 2023 a host leh tur chu a phur hle tih Zonuni chuan a sawi a, "Zai leh rimawi lama tui mite tan hunpui ber Ṭhazual Award vawi 9-na chu kan hmang leh dawn ta. He Award Show hian ṭhalaite zingah boruak a nei lian hle a, a show chhung a ṭhalaite'n an thiamna leh theihnate tihlanna hun ṭha an nei ṭhin hi lawmawm ka ti hle bawk. Entertainment khawvelah he Award Show hian Zofate hma min sawntir zel a, kum tela hmasawnna ṭha zawk hmuh zel pawh ka beisei. Ṭhazual Award 2023 ka kaihruai leh thei tur pawh hi ka phur tawh hle a ni," tiin Vanglaini a hrilh.

Kum danga an tih ṭhin angin, kumin Ṭhazual Award-ah pawh hian Mizo fashion designer larte nen an thawkho leh dawn. Zonuni pawh hian a hak tur thlang fel tawhin, Gospel zanah Teremi Ralte leh Lapar puan a bih dawn a, Lengzem zanah Christine V a ha thung ang. Makeup by Jenn in a chei dawn bawk a ni.