Taylor Swift-in a fan thih vangin a concert hun sawn

Brazil-a Eras tour nei mek, Taylor Swift chuan kar liam ta Zirtawpnia a concert en tura kal zinga pakhat damlo a, damawi ina hruai a nih hnua a thih avangin, a tuk Inrinnia Rio de Janeiro-a show a neih tur chu a hun a sawn.

Brazil hian khaw lum nasa tak an tuar mek a, Zirtawpni liam taa khaw lum lam chu 59.3C a tling nia sawi a ni. Swift chuan a Instagram-ah a fan thihna chuan a rilru a tina hle tih sawiin, stage-ah phei chuan a sawi chhuak thei lo tih a sawi. Staff-te hnenah pawh concert laia fan-te hnenah tui te sem turin a ngen a, Brazil justice minister Flavio Dino pawhin X-ah fan-te chu concert-na hmuna tui an ken luh phalsak a ṭul niin a sawi bawk. Brazil-a Eras Tour organiser, T4F Entertainment hnenah fan-te chu a thlawna tui in tur awlsam an hmuh theihna buatsaih turin a hriattir nghal bawk.